InfoHub Logo

Ulttyq statısıka búrosy Qazaqstan boıynsha ortasha jáne medıandyq jalaqy mólsherin jarıalady. Bul derekter eldegi ekonomıkalyq jaǵdaı men halyqtyń tabys deńgeıin baǵalaýǵa kómektesedi.

Bul týraly Infohub.kz aqparat agenttigi habarlaıdy.

2026 jyldyń birinshi toqsanynda Qazaqstan boıynsha ortasha aılyq nomınaldy jalaqy 461 486 teńgeni qurady. Bul ótken jyldyń sáıkes kezeńimen salystyrǵanda 9,1 paıyzǵa artqanymen, ınflásıany eskergende 2,3 paıyzǵa tómendegen.

Aımaqtar boıynsha ortasha jalaqy

Aımaqtyq bóliniste ortasha aılyq nomınaldy jalaqynyń eń joǵary ósimi Abaı oblysynda – 14,2 paıyz (405 425 teńge), Pavlodar oblysynda – 12,4 paıyz (448 906 teńge), Jetisý oblysynda – 12,2 paıyz (346 199 teńge), Almaty oblysynda – 10,9 paıyz (376 012 teńge) jáne Almaty qalasynda – 10,7 paıyz (574 162 teńge) tirkeldi.

Eń joǵary ortasha jalaqy Mańǵystaý oblysynda – 659 801 teńge, Ulytaý oblysynda – 655 995 teńge, sondaı-aq Atyraý oblysynda (652 950 teńge) boldy.

Salalar boıynsha jalaqy ósimi

Ortasha aılyq jalaqynyń eń úlken ósimi aýyl, orman jáne balyq sharýashylyǵynda – 20,3 paıyz, qarjy jáne saqtandyrý qyzmetinde – 18,1 paıyz, sýmen jabdyqtaýda – 16,5 paıyz, elektrmen, gazben, býmen jabdyqtaýda, ystyq sýmen jáne aýany baptaýda – 14,7 paıyz, kólik jáne qoımalaýda – 12,9 paıyz jáne ónerkásipte – 11,6 paıyz tirkeldi. Densaýlyq saqtaý jáne halyqqa áleýmettik qyzmet kórsetý salasynda – 7 paıyzǵa, bilim berý salasynda – 4,2 paıyzǵa ósti.

Medıandyq jalaqy

2026 jyldyń birinshi toqsanyndaǵy medıandyq jalaqy (jalaqy qatarynyń ortańǵy deńgeıi) 331 527 teńgeni qurady. Medıandyq jalaqy barlyq qyzmetkerlerdi eki teń topqa bóledi: jartysy bul somadan az, al ekinshi jartysy kóbirek tabys tabady. Bul kórsetkish óte joǵary nemese óte tómen jalaqylardy esepke almaǵanda, «ortasha» adamnyń qansha tabys tabatynyn kórsetedi.