InfoHub Logo

Italıadaǵy Olımpıadada temirjolǵa dıversıa jasaldy

Italıada ótip jatqan 2026 jylǵy qysqy Olımpıada oıyndarynda temirjolǵa jasalǵan dıversıa saldarynan poıyzdardyń qozǵalysy ýaqytsha toqtatyldy. Bul týraly Infohub.kz aqparat agenttigi habarlaıdy.

Oqıǵa 7 aqpanda, senbi kúni boldy. Belgisiz bireýler Italıanyń soltústigindegi temirjolǵa dıversıa jasady. Saldarynan joǵary jyldamdyqty jáne aımaqtyq poıyzdardyń keshigýi 2,5 saǵatqa deıin jetti.

Tergeý málimetteri

Italıa polısıasynyń málimetinshe, dıversıalyq áreketter úsh jerde tirkelgen. 7 aqpanǵa qaraǵan tańerteń Adrıatıka jaǵalaýyndaǵy Pezaro qalasynyń mańyndaǵy elektr qalqanyna ot qoıylǵan. Bolonáda belgisiz bireýler poıyzdyń jyldamdyǵyn ólsheıtin kabeldi kesip tastaǵan. Boloná men Padýıa qalalarynyń arasyndaǵy temirjol ýchaskesinde qarapaıym jarylǵysh zat tabyldy.

Italıanyń Ferrovie dello Stato (FS) memlekettik temirjol kompanıasynyń habarlaýynsha, joǵary jyldamdyqty poıyzdar ótetin Boloná vokzaly ýaqytsha jabyldy. FS kompanıasy elektr qalqanyndaǵy órt pen kabeldiń zaqymdalýyna tehnıkalyq aqaýlar sebep bolýy múmkin degendi joqqa shyǵardy.

Qazirgi ýaqytta polısıanyń terorızmge qarsy bólimshesi tergeýdi júrgizip jatyr. Barlyq jaǵdaılar ózara baılanysty sıaqty, biraq ázirge eshkim jaýapkershilikti óz moınyna almady.

Boloná – Italıanyń ońtústigi men soltústigin baılanystyratyn mańyzdy temirjol toraby, sondaı-aq Olımpıada oıyndaryn ótkizetin qalalarǵa: Mılan men Kortına-d'Ampessoǵa baratyn baǵyttar úshin de mańyzdy.

Kúnniń ekinshi jartysynda Italıadaǵy temirjol qatynasy birtindep qalpyna keltirildi. Dpa agenttiginiń habarlaýynsha, polısıanyń terorızmge qarsy bólimshesi tergeýge tartyldy. Italıanyń kólik mınıstrligi bul oqıǵany «dıversıanyń aýyr jaǵdaıy» dep atady.

Qysqy Olımpıada oıyndary 7 aqpanda Italıada bastaldy. Qazaqstan quramasy oıyndarda on sport túrinen synǵa túsetin 36 sportshymen ókildik etedi.