InfoHub Logo

İlki sátte sanasy iske qosylǵan ol, aınalasyna kóz súzdi. Aıdalada tur eken, kóz jeter jerde eshkim kórinbeıdi. Óz denesine qarady, ústinde lypa joq. Tyr-jalańash. Bazbir buzaqylar sheshindirip, tonap ketkendeı. Biraq esh qysylmady, sebebi muny kórip turǵan eshkim joq bolatyn. Bárinen buryn alańdatqany jalǵyzdyq edi. Qabyrǵasy qaıysa qaıǵyrdy, óziniń jalǵyzdyǵyna. Bir nárselerdi esine túsirgisi kelgen, eshteńe ónbedi. Sanasy aq paraq sekildi, tap-taza. Mı qýystarynda tek tabıǵat qubylystarynyń elesi tur, sondaı aq qorshaǵan ortany biletin sıaqty. «Anaý turǵan aǵash» dedi, anadaıda qýaryp turǵan jalǵyz terekti ózine kórsetip. «Mynaý Jer» dedi, tabanynyń astyn oń aıaǵymen tebip. Aýyq-aýyq áldenelerdi aıtty óz-ózine. Biraq adamdarǵa qatysty esh nárse oralmady esine. «Sirá, men jer betindegi eń sońǵy adam shyǵarmyn. Bir alapat dúleıde barlyǵy qyrylyp, qatty soqqydan qulaǵandyqtan esimnen aýysyp, osy sátte ǵana óz-ózime kelip turǵan shyǵarmyn» dep oılady. «Biraq, jer betindegi eń alǵashqy adam bolýym da múmkin ǵoı, esh nárse esime túser emes» degen ekinshi bir oı qylań berdi sanasynda. Shegi joq eki oıdyń ortasynda aqyl-esi biraz sarsańǵa tústi. Qaısysy aqıqat, qaısysy ótirik, shetine jete almady eki oıdyń. Eseńgiregen qalypta birshama ýaqyt ornynda turdy da, júrip ketti.

Qulazyp keledi. Kóp ýaqyttardan keıin bir teńizge tap boldy. Tirshilik ıesi joq sekildi, tym-tyrys. Jym-jyrt. Maıda tolqyndardyń bulqynystary qaýqarsyzdyqtaryn anyq sezdiredi. Teńizdiń jaǵasymen júre berdi. Taýsylatyn emes. Kún uıasyna qonaqtaǵan kezde teńiz jaǵasynan bir iz kezdestirdi. Sýly topyraqqa túsken iz, óziniń tabanynan túsken izge uqsaıtyndaı. Dál janynan basyp, tabanynyń izin qaldyrdy. Birdeı eken, adamnyń izi, tek sál kishkentaı. Ol da jalańaıaq eken. Dúnıege áli kelmegen jalǵyzdyqtyń, ne álemdegi eń sońǵy jalǵyzdyqtyń ıesi atanyp otyrǵan ol, alańdaýly kóńiline jubanysh tabylǵandyǵyna essiz qýanyp, belgisiz baǵytqa bastaǵan izdiń sońyna ilesti. Qarańǵy túskesin adasyp qalarmyn degen oımen, toqtaǵan jerinde túnep shyǵýǵa bekindi.

Tań atqasyn qaıtadan jolǵa shyqty. Kúni boıy salpań júris, iz jetkizer emes. Teńizden tym alystap ketken bolatyn bul ýaqytta. Keshqurym sharshap-shaldyǵyp, toqtaǵan jerine qısaıa tústi. Erteń jalǵastyramyn dedi ishteı. Ertesine taǵy da izdiń sońynan erdi. Bir qaraǵanda óziniń aldynda ǵana júrip ótkenindeı kóringenimen, jetkizer emes, ol da toqtamady. Sonymen ekinshi kún ótti, izdiń ıesi tabylmady. Úshinshi kúni de áreketin jalǵastyrdy. Tús kezi bolsa kerek, kún tas tóbeden tóngende tesip óterdeı shaqyraıady. Jalańash denesi shyjǵyrylyp barady. Erini kezerip, shóldeı bastady. Tili aýyzyna sıar emes. Mort ketti.

— Eı, iz, qaıda barasyń? Meni qaıda aparasyń? Ień qaıda? – dep surady.

İzden jaýap joq, shubatylǵan qalpy belgisiz baǵytqa asyǵyp barady.

— Eı, iz, meni qaıda aparasyń,— deımin.

Eshteńe estimedi.

Kúnder óte berdi, qansha tań atyp, qansha kún batqanynan ózi de shatasa bastady. Túlki bulańǵa salǵan iz jetkizer emes, jóńkilip ketip barady. Ol ábden sharshap-shaldyqqan edi, dińkesi quryp, boıyndaǵy kúsh-qýaty taýsyldy. Áıteýir bir kúni tús kezinde shubatylǵan iz qalyń jynysty ormanǵa kelip tireldi. Ormannyń shetine aýyq-aýyq qulap, aýyq-aýyq ornynan qaıta turyp áreń jetti. Biraq ormanǵa sińgen izden ári qaraı eshqandaı belgi taba almaı qoıdy. İzim-qaıym, esh belgi tabylmady. Ol qalyń ormannyń ishine kirip álgi izdiń ıesin izderin, ne kelgen izimen keıin qaıtaryn bilmedi. Bul ýaqytta kúnde qyzaryp, uıasyna qonaqtaýǵa asyǵa túsken edi.

---