InfoHub Logo

Biz únemi isterimizdi búgin isteýge erinip, erteńge qaldyryp jatamyz. Bul qalypty jaǵdaı. Biraq jalqaýlyq jar bermeı, barlyq josparlarymyzdy oryndaýǵa kedergi keltirip jatsa ne isteımiz?

Biz búgin jalqaýlyqty jeńetin eń jaqsy ádisterdi usynamyz:

1. Usaq-túıekke mán berme

Adamdardyń kóbi ýaqyttaryn kofe, shaı demdeýmen, poshtasyn tekserýmen, áleýmettik jelilerdegi jańalyqtardy oqýmen, súıikti saıtyndaǵy jańa kıim toptamalaryn tamashalaýmen jáne sol sıaqty mańyzdy emes istermen bekerge ótkizedi. Mundaı istermen aınalysqan kezde jumysqa bólingen altyn ýaqyttyń qalaı zyr etip óte shyqqanyn baıqamaı da qalasyń. Sondyqtan, mundaı usaq-túıek isterge aldanbaı, bar zeıinińdi jumysqa shoǵyrlandyr.

2. Jumys jospary

İsiń jyldam ári tabysty júrsin deseń, onda oıǵa alǵan maqsattaryńnyń bárin tizimdep jazyp qoı. Aldaǵy ýaqytqa jumys josparyn jasa. Uzaqmerzimdi jáne qysqamerzimdi josparlar qur. Esińde bolsyn: úlken isterdi birneshe kezeńge bólip qoıý kerek. Osylaısha oılanýǵa jáne demalýǵa ýaqyt taba alasyń.

3. Motıvasıa

Eńbegińniń máni týraly eske túsiretin birnárse iste. Mysaly, maqsatyń avtokólik satyp alý bolsyn. Onyń qandaı bolý kerek ekenin anyqtap, sýretin kompúterdiń nemese telefonnyń jumys ústeline ornalastyryp qoı. Óz jumysyńdy ne úshin atqaryp júrgenińdi eskertip turatyn eskertýlerdi basyp shyǵar. Sondaı-aq, uly adamdardyń maqsattar, armandar týraly qanatty sózderi jazylǵan jáne motıvasıalyq kitaptardy satyp al. Boıyń bosańsyı bastaǵanda, dereý sol kitaptardy oqy. Qanatty sózderdiń bári seni mindetti túrde shabyttandyrady.

4. Tańdy durys qarsy al

Táýliktiń 8 saǵatyn uıqyǵa jumsa. Al oıanǵan sátte tósekten birden turyp ketpeı, birneshe mınýt kerilip-sozylyp, jańa kún týraly oılan. Tańǵy jattyǵý jasaýǵa erinbe. Bes mınýttyq jeńil jattyǵýlardyń ózi kúni boıy sergek júrýge kómektesedi. Ystyq-sýyq sýdy kezektestirip sebezgige (kontrastnyı dýsh) túsý — aǵzany oıatyp, oǵan kúsh-qýat berýdiń eń jaqsy ádisi. Tańǵy as — kúnniń jaqsy bastalýynyń kepili. Ol jeńil bolý kerek. Tańǵy asqa súzbe, astyq daqyldary, jemister, botqa jáne shyryn jetkilikti bolady.

5. Ýaqytty durys paıdalaný

Ýaqytty josparlaý óneri — bos ýaqytyńdy bir shyny-aıaq kofe ishýge de únemdeı alady. Biz qazir «ýaqyt jetpeı qaldy» degen túsinikke oryn joq zamanda ómir súrip jatyrmyz. Keıde berilgen jumys kólemin bir saǵatta nemese bir kúnde oryndaý múmkin emes sıaqty kórinip ketedi. Sol kezde bizge kómekke taım-menedjment keledi. Óz mindetterimizdi oryndaý arqyly biz maqsattarymyzǵa, armanymyzǵa kún saıyn jaqyndaı beremiz. Sol úshin de barynsha tyrysýǵa bolady. Keıbir kúnderdi saıabaqta serýendeý úshin, kıno tamashalap nemese kúni boıy eshnárse istemeı, tek qana eski sýretterdi kórip jatý úshin arnaǵan da jón. Biraq buǵan boıy aldyryp ketpe. Jalqaýlyq — jaqsy ádet emes.

6. Men – jaradym!

Ózińe bir shart qoı: mysaly, eger jospardaǵy isti atqara alsam, ózime ádemi kóılek alamyn. Syılyq kólemi atqarylǵan iske baılanysty. Sondyqtan, bári óz qolyńda!

7. Úzilis

Jumys arasynda úzilis jasap tur. 20-30 mınýt jumys istegennen keıin 5 mınýt tynyshtyqta otyr nemese taza aýamen tynystap kel. Osyndaı úzilisten keıin istegen isińdi tynyqqan mımen durys baǵalaı alasyń.

8. Keıinge soza berme

Jalqaýlyqty bas kótermeı turyp jeńip tasta. Eń bastysy — munyń jalqaýlyq nemese basqa bir syrqattyń belgileri ekenin durys anyqtap, qatelespeý kerek. Álsizdik, kóńilsizdik, uıqyshyldyq? Eger syrqattyń osy atalǵan belgileri anyq baıqalmasa, onda bul jalqaýlyq. Jalqaýlyq sanamyz ben denemizdi jaýlap almaı turǵanda tez arada isti qolǵa alamyz!

---