InfoHub Logo

Jambyl oblysynda jurtshylyqty tań-tamasha qaldyrǵan oqıǵa boldy. Týystary qaıtys boldy dep oılap, jerlep tastaǵan áıel bir aıdan keıin tiri kúıinde úıine oraldy.

Bul týraly Infohub.kz aqparat agenttigi habarlaıdy.

Oqıǵanyń bastalýy

1953 jyly týǵan áıel 2024 jyldyń tamyz aıynda Taraz qalasyna kóship kelip, ápkesiniń úıinde tura bastaǵan. Alaıda, 2025 jylǵy Qurban aıt merekesinen keıin ol kenetten habarsyz ketken. Biraz ýaqyt boıy eshqandaı habar bolmaǵan soń, týystary polısıaǵa aryzdanǵan.

Keıin 2025 jyldyń tamyz aıynda aýyl mańyndaǵy daladan belgisiz áıeldiń máıiti tabylady. Osy fakti boıynsha qylmystyq is qozǵalǵan. Týystary máıitti joǵalǵan analary dep tanyp, resmı túrde ólim týraly akt rásimdelip, tıisti kýálik te berilgen.

Kútpegen jaǵdaı

Alaıda, bir aıdan keıin, ıaǵnı 2025 jyldyń qyrkúıek aıynda áıel Jambyl aýdanyna qarasty Qostóbe aýylyndaǵy aǵasynyń úıine tiri kúıinde kelip, barlyǵyn tańǵaldyrǵan. Budan keıin onyń qyzy anasynyń quqyqtyq mártebesin qalpyna keltirý úshin sotqa júgingen.

Áıeldiń aıtýynsha, Qurban aıttan keıin ol Aısha bıbi aýylyna baryp, pıaz jınaý jumysyna kirisken. Sol jerde ýaqytsha turyp, jumys istegen. Keıin zeınetaqysy toqtaǵanyn baıqap, Tarazǵa barǵanda óziniń "qaıtys boldy" dep tirkelgenin bilgen. Týystarynyń aıtýynsha, onyń keıde uzaq ýaqytqa eskertýsiz ketip qalatyn ádeti bolǵan eken.

Sot sheshimi

Jambyl aýdandyq soty júrgizgen tekserýler nátıjesinde tabylǵan máıittiń basqa adamǵa tıesili ekeni anyqtaldy. Polısıa eksgýmasıa jasap, qosymsha sot-medısınalyq jáne genetıkalyq saraptamalar júrgizgen.

Nátıjesinde marqumnyń kim ekeni naqty anyqtalyp, qozǵalǵan qylmystyq is toqtatyldy. Sot áıeldiń "qaıtys boldy" degen qujattaryn jaramsyz dep tanyp, ólim týraly aktiniń kúshin joıdy. Sot sheshimi zańdy kúshine endi.