Jámıla!
Munsha nege júdediń?
Betinde tamshy qan joq qoı.
Jaraly ma júregiń?
Teginde, tereń zar kóp qoı!
Jámıla!
Sebebi ne? Jalǵanda
Serpiligi, oınap-kúlmeısiń.
Túnde jurt uıqtap qalǵanda,
Tynshyp bir uıqy kórmeısiń.
Jámıla!
Keýdeńe ot toldy ma?
Ý hilep aıǵa qaraısyń.
Ómiriń ý boldy ma?
Juldyzdar nege sanaısyń?
Jámıla!
Shapanyńdy búrkenip,
Tysqa aqyryn shyqqanda,
Kúrsinip, aýyr kúńirenip,
Aıtqanyń zar ma ıa án be?
Jámıla!
Janyndaǵy jaýyzyń
Aıyrdy ma jaryńnan?
Sarǵaımashy, baýyrym,
Bitesiń ǵoı zaryńnan.
Jámıla!
Túsken mynaý júzińe
Qasiret pe, ıakı shashyń ba?
Qaıǵyly qara kózińde
Móldiregen jasyń ba?
Jámıla!
Betinde anaý tańba ne?
Ah... ımansyz ol haıýan!
Jalyn, janym, Alla de!
Budan basqa ne haılań?!
Jámıla!
Qasiretti, sorly qaryndas,
Qaıǵyǵa qalaı shydaısyń?
Jyla, baýyrym, tógip jas,
Men de birge jylaımyn...
Jámıla!.. Jámıla!.. Jámıla!..

---