InfoHub Logo

Abaı oblysynda joǵalyp ketken malshy 5 kúnnen keıin aman-esen tabyldy. Ol osy ýaqyt ishinde tek qar jep jan saqtaǵan. Oqys jaǵdaıǵa tap bolǵan 57 jastaǵy Qymbat Semeıbaev oqıǵanyń mán-jaıyn Sputnik Qazaqstan tilshisine baıandap berdi.

Bul týraly Infohub.kz aqparat agenttigi habarlaıdy.

Oqıǵa 17 naýryzda bolǵan. Malshy úıirinen adasqan bıeni izdep shyqqanda, aıaǵy astynda qalyp, aıaǵy synǵan. «Bir bıe úıelep qalypty. Mingen atymdy qolyma baılap, ana bıeni ıterip turǵyzyp jibereıin dep edim, bıe turyp baryp qaıta jatyp qaldy. Sol kezde bir aıaǵym astynda qalyp qoıdy. Súıegim bytyr ete qaldy, janym kózime kórindi. Aıaǵymnyń synǵanyn bildim», - deıdi Qymbat aǵa.

Aıaǵyn syndyryp, dalada qaldy

Aıaǵyn syndyrǵan malshy atyna mine almaǵan. Telefonmen habarlasý múmkin bolmaǵandyqtan, ol kómek shaqyra almaǵan. «Qansha áreket etsem de mine almadym, myna synǵan aıaǵym túk ıkemge keltirmedi. Saý aıaǵymdy kóterip kórip edim, synǵan aıaǵym burań ete qaldy, janym kózime kórindi. Qolymda telefonym boldy, biraq baılanys joq, eshkimge habarlasa almadym. Jatqan jerim sý boldy, ábden tońdym», - dep eske aldy ol.

Týǵan kúnin dalada qarsy aldy

Qymbat Semeıbaev 19 naýryzda, týǵan kúninde dalada, aq qardyń ústinde jatqan. Ol 57 jasqa tolǵan. Malshynyń aıtýynsha, ol tek qar jep jan saqtaǵan. «Ne uıqy joq, dala sýyq, jan kerek eken, qar jeı berdim. Qazir aýrýhanadamyn, aıaǵym úsh jerden synyp ketipti. Meni qutqarǵan polıseıge, qutqarýshylarǵa rahmet», - dedi ol.

Polısıa izdeý jumystaryn bastady

Malshynyń jubaıy men balasy polısıaǵa habar bergennen keıin, Abaı aýdany polısıa bóliminiń ýchaskelik polısıa ınspektory Abylaıhan Aqataev bastaǵan top izdeý jumystaryn bastady. Olar 100 shaqyrym jerdi 7 saǵatta júrip ótip, malshyny tapqan. «Biz sol jerge qaraı kele jatqanda jarqyldaǵan bir nárse kórindi. Sóıtsek aǵamyz telefonyn kúnge shaǵylystyryp, jaryq túsirgen eken. Sondaı álsirep qalǵan. Kele salyp sháı berdik, tilge kele bastady», - deıdi polısıa ınspektory.

Qymbat Semeıbaev 17 naýryzda joǵalyp ketip, 22 naýryz kúni tabylǵan. Polısıa men qutqarýshylar ony úsh kún boıy tynbaı izdegen.