InfoHub Logo

(kúndelik paraqtarynan)

Sálemetsiń be, kúndelik! Ádettegideı.. seniń áppaq betterińe ishimde bulqynyp jatqan alapat álemimniń beınesin syzý úshin qalamymdy qolyma qapsyra ustap aldym. Aıtaıyn búgin ne dertpen keldim. Jaqsy kórý.. ıá-ıá, jan júregińmen súıý baqytynyń azaptary jaıly sher tarqatam. Kóp kórip júrip súıikti etý emes, bir qarap es ketý.

...Men de senbeıtin sezim bolǵan. Solaı bolyp qala berse ǵoı, jáı-kúıim dál búgingideı bolmas pa edi.? Nege deıtin shyǵar ıá, kim bolsa da? Kúndelik! Endeshe men kóz monshaǵymmen syrymdy jazaıyn, al sen kirshiksiz kórkińe túrtip ala ber, buljytpaı.

Súıikti adamdy pák kóńilmenen súıý úshin onyń kóz álemindegi tuńǵıyqqa bir sát qana súńgip, az ýaqyt janaryna janaryńdy túıistirýdiń ózi jetip, artylyp jatyr. Ras aıtam. Men keship júrgen kúı osy!.

.. Bir-aq sát qana.. dármenim jetip syrly sulýlyǵyna janar berdim de - óz-ózimmen júregimniń ámirshisine aınaldyrdym, kóńil-kúıimniń jalǵyz sebepkerine, kómeıime tunǵan asyl sózderden týyndaıtyn tıtteı jyrlarymnyń keıipkeri de - sol! Júregimniń tórinen oryn da berip qoıǵam, árdaıym amandyǵy alańdatatyn qıalymdaǵy ǵajabym da - sol jan! Ózine jalǵyz-aq ret qaraýyma múmkindik berip, bútin bir ómirimdeı kóretin ardaqtym bop shyǵa keldi..

Baqytty jan ba? Álde, sezim bildirýdi "ar" kóretin uıań qyzdyń saǵynyp jylaǵan saıyn janarynan atqylaıtyn móldir monshaqtyń týýyna sebepshi bolyp, bir jannyń kúnásin ózi sezbeı arqalap júrgen beıbaq pa!? Súıýge turarlyq jan bolyp, áıteýir bir jannyń bolsa da túnde tústerinde, oıaý sátterde oıy men qıalynda júretin, shynaıy saǵymǵa aınalǵan hanzada bolǵany shyǵar.?! Múmkin ózin ańsaıtyn bireýdiń baryn bilmeıtin, sezbeıtin shynymen de janashyrlyq kózben qararlyqtaı jan ba eken? Áı, uqpaımyn-aý osyny.! Ne bilem, jazaıyn ba: jabyqqan sátte, ystyq dıdaryn kórgim kelip zaryqqan kezde, saǵynǵan sátterde alaqany kep jasymdy súrter, únin esittirip jubatar ma edi degen oılar kelgende osynsha ózgeriske tap bolmas edim dep ózegim órtenip, ishi-baýyrym kúıip jylaýdy bilem; tym bolmaǵanda, bir qala ómirin keship jatyrmyz, aýzymyzda bir sýdyń dámi, aınalamyzda ekeýmizde de bir kórinis ekendigi jaıynda ózimdi jubatar kelte oılar týsa shynaıy súısinip kúlimdep, ádemi ezý tartyp qoıýdy bilem...

...Kúndelik! Seniń qazir ár paraq betterińe tyrs-tyrs tamyp jatqan jastarym - jan álemimniń saǵynyshtan ósip jatqan súıkimsiz azaptaryna shydaı almaı jatqandyǵymnyń dáleli,  sezimime tunshyǵyp otyrǵandyǵymnyń kórinisi...
  

Gúldana BEKBOLAT

---