InfoHub Logo

Úkimet úıindegi kezekti otyrys erekshe sátpen este qaldy. Premer-mınıstr Oljas Bektenov Jasandy ıntellekt jáne sıfrlyq damý vıse-mınıstri Rostıslav Konáshkınniń áreketine súısinip, ony áriptesterine úlgi etti. Sheneýniktiń memlekettik tilde múdirmeı sóıleýi Úkimet basshysynyń nazarynan tys qalmady.

Rostıslav Konáshkın minberge kólik-tranzıt salasyn sıfrlandyrý máseleleri boıynsha baıandama jasaýǵa shyqqan bolatyn. Kópshilik ony ádettegideı resmı tilde sóıleıdi dep kútkenimen, vıse-mınıstr sózin bastan-aıaq qazaq tilinde jetkizdi.

Muny kórgen Oljas Bektenov rızashylyǵyn jasyrmady.

«Jaqsy, qazaqsha baıandadyńyz. Durys, úırený kerek», — dedi Premer-mınıstr qysqa ári nusqa qaıyryp.

Baıandama ne týraly boldy?

Vıse-mınıstrdiń sózinshe, elimizde sıfrlandyrý qarqyndy júrip jatyr. Qazirgi tańda kólik-tranzıt salasyndaǵy 38 memlekettik qyzmettiń barlyǵy tolyǵymen onlaın formatqa kóshken.

Statısıkaǵa súıensek, 2024 jyly kórsetilgen qyzmetterdiń 94 paıyzy elektrondy túrde júzege asqan. Konáshkınniń pikirinshe, bul qarapaıym halyq pen bıznes ókilderi úshin ýaqyt únemdeýge jáne búrokratıany azaıtýǵa úlken septigin tıgizip otyr.

Bektenovten «bárekeldi» estigen alǵashqy sheneýnik emes

Aıta keteıik, bul mınıstrlikte memlekettik tilge degen qurmet erekshe jolǵa qoıylǵanǵa uqsaıdy. Bıylǵy aqpan aıynda Oljas Bektenov dál osy vedomstvonyń taǵy bir ókili — Dmıtrıı Mýndy maqtaǵan edi (ol qazir de vıse-mınıstr laýazymynda).

Sol kezde Dmıtrıı Mýn ýádesinde turyp, baıandamasyn memlekettik tilde jasaǵany úshin Úkimet basshysynan «sózinde turatyn jigit» degen joǵary baǵa alǵan bolatyn. Bul úrdis basqa memlekettik qyzmetshilerge de jaqsy oı salýy múmkin.