InfoHub Logo

Qazaqstandyq MMA juldyzy Qýat «Naıman» Hamıtov taǵy da kópshiliktiń nazaryn ózine aýdardy. Bul joly tájirıbeli sportshy tanymal akter ári faıter Erkebulan Toqtarmen judyryqtasýǵa nıet bildirip otyr. Biraq shart boıynsha jekpe-jek MMA emes, kásipqoı boks erejesimen ótýi tıis.

Hamıtov óziniń Instagram paraqshasynda otandyq promoýshenderdi synǵa alyp, naǵyz shoýdyń joqtyǵyna qynjyldy. Onyń oıynsha, jankúıerler kútken naǵyz "blokbaster" — osy eki juldyzdyń kezdesýi bolmaq.

«Naımannyń» pikirinshe, Qazaqstandaǵy qazirgi týrnırler jankúıerlerdiń talabyna saı emes.

«Keshir, bratan, biraq...»

Qýat Hamıtov jergilikti uıymdastyrýshylardyń deńgeıine kóńili tolmaıtynyn ashyq aıtty. Ol qazirgi jekpe-jek keshterin «jasandy» dep baǵalady.

«Qazaqstandaǵy promoýterlerdiń týrnır uıymdastyrý deńgeıinen shynymen de kóńilim qaldy! Naǵyz masshtab qaıda, shoý qaıda? Bári jasandy, bári ótirik qoı… Jyldyń eń aıtýly jekpe-jegi – Qýat Hamıtov pen Erkebulan Toqtar arasyndaǵy kezdesý! Budan asqan jekpe-jek otandyq boks alańynda bolmaıdy!», – dep jazdy sportshy.

Sonymen qatar, Hamıtov óziniń jeńiske jetetinine júz paıyz senimdi. Ol qarsylasyna degen qurmetin saqtaı otyryp, rıngte aıamaıtynyn eskertti: «Men keshirim suraımyn árıne, biraq, bokstan uryp jiberem, bratan».

Tájirıbe men jastyq: Kim myqty?

Eger bul jekpe-jek rasymen ótse, kimniń basym túsetini qyzyq suraq.

• Qýat Hamıtov: Kásipqoı boksta bir ǵana kezdesý ótkizgen. Byltyr qyrkúıekte otandasy Nurbergen Sháripovti tóreshiler sheshimimen jeńgen bolatyn.

• Erkebulan Toqtar: Ol da osal qarsylas emes. Jaqynda ǵana, 16 tamyzda Qonaevta ótken Octagon 77 týrnırinde ırandyq Farzad Gaderıdi ekinshi raýndta tehnıkalyq nokaýtpen jeńdi. Bul onyń MMA-degi 11-shi jeńisi edi.

Ázirge Erkebulan Toqtar tarapynan resmı jaýap bolǵan joq.