InfoHub Logo

Jas shahmatshylar Javohır Sındarov pen Bıbısara Asaýbaevanyń úılený toıy týraly qaýesetterge núkte qoıyldy. Ózbekstandyq grosmeısterdiń ájesi nemeresi men qazaqstandyq shahmatshy qyzdyń arasyndaǵy qarym-qatynasqa qatysty pikirin bildirdi.

Bul týraly Infohub.kz aqparat agenttigi habarlaıdy.

Dostyqtan basqa eshteńe joq

Eki jas sportshynyń da joǵary jetistikterine qaramastan, jankúıerlerdiń nazary sońǵy kezderi olardyń jeke ómirine aýdarylyp júr. Mundaı pikirtalasqa Bıbısara Asaýbaevanyń áleýmettik jelide Sındarovty «meniń chempıonyma» dep, júrek emodzıimen quttyqtaýy sebep boldy.

Jaǵdaıǵa qatysty pikir bildirgen sportshynyń ájesi, olardyń Asaýbaevamen bala kezinen tanys ekenin atap ótti:

«Ázirge olar dos. Aldyn ala eshteńe aıtý qıyn. Biz Bıbısarany jas kezinen bilemiz, jıi kórisip turatynbyz, birge shahmat oınaıtyn. Qazir olar dos. Alda ne bolatynyn bilmeımiz. Eger bir kúni ol: «Maǵan osy qyz unaıdy, men ony jaqsy kóremin» dese, biz onyń tańdaýyn quptaımyz», - dedi ol zamin.uz portalyna bergen suhbatynda.

Týrnırdegi jetistikter

Sportshylardyń arasyndaǵy qarym-qatynasqa degen qyzyǵýshylyq, olardyń Kıprdiń Pafos qalasynda ótken «Úmitkerler týrnıri – 2026» baıqaýyndaǵy tamasha oıyndarynan keıin artty.

Javohır Sındarov erler arasyndaǵy týrnırde tarıhı jetistikke jetti. Ózbekstandyq 20 jastaǵy grosmeıster jarysta birde-bir ret jeńilmeı, merziminen buryn jeńimpaz atandy. Bul jeńis oǵan álem chempıony ataǵy úshin qazirgi ıeger Gýkesh Dommaradjýmen kezdesýge joldama berdi.

Al áıelder arasyndaǵy týrnırde Bıbısara Asaýbaeva Qazaqstan tarıhyndaǵy úzdik nátıjeni kórsetti. Grosmeıster jarys boıy kósh bastap, aqyry úndistandyq shahmatshy Vaıshalı Rameshbabýdan nebári jarty upaıǵa qalyp, ekinshi orynǵa ıe boldy.

Dál osy Pafosta Asaýbaeva Sındarovty jeńisimen alǵashqylardyń biri bolyp quttyqtap, bergen suhbatynda ony maqtan tutatynyn jáne onyń jetistiginiń laıyqty ekenin aıtty.

Sportshylar týraly

Bıbısara Asaýbaeva – eki dúrkin álem chempıony, áıelder arasyndaǵy grosmeıster. Qazaqstan áıelder quramasynyń kóshbasshysy.

Javohır Sındarov – tarıhtaǵy eń jas grosmeısterlerdiń biri (12 jasynda normatıvti oryndaǵan). Ózbekstan quramasy sapynda shahmattan álemdik olımpıadanyń jeńimpazy.