InfoHub Logo

Mańǵystaý oblysynyń Mańǵystaý aýdanynda anomaldy aýa raıy saldarynan 100-den astam jylqy qyryldy. Bul týraly Lada.kz saıtyna silteme jasap Tengrinews.kz habarlady.

Qatty jaýyn-shashynnan keıin maldar sor alqaptarǵa batyp, kóbisi qaza tapty. Jergilikti turǵyndardyń aıtýynsha, ár sharýa qorasynan birneshe basqa deıin on shaqty jylqy joǵalǵan.

«Qatty jańbyrdan keıin Aqshymyraý aýyly mańyndaǵy mal sýǵa ketip, sor alqapqa batty. Kóptegen jylqylar tuzdy batpaqqa keptelip óldi, al qalǵandary shyǵa almaı jatyr. TJM men jergilikti bılik kómek kórsetpese, jaǵdaı kúrdelilenýi múmkin», - dep jazdy aýyl turǵyndary.

Olar zańgerler men janýarlar quqyǵyn qorǵaýshylardy máselege nazar aýdarýǵa shaqyrdy.

Akımdikten málimet

Mańǵystaý aýdany ákimdiginiń habarlaýynsha, jaǵdaıdy baǵalaý úshin memlekettik organdar ókilderiniń qatysýymen arnaıy komısıa qurylǵan. Aldyn ala derekter boıynsha 100-den astam jylqy tabylǵan. Qazirgi ýaqytta jergilikti atqarýshy organdar ólgen mal sanyn naqtylap jatyr, sebebi ıeleri áli de mal basyn tolyq esepteı almaı otyr.

Aldyn ala baǵalaý boıynsha, maldyń qyrylýyna tótenshe aýa raıy – qatty jel men nóser jańbyr sebep bolǵan. Mal adasyp, jetýi qıyn aýmaqtarǵa baryp, sýǵa shaıylǵan jerde qaza tapqan. Keıbir úıirler eldi mekenderden 60-80 shaqyrym qashyqtyqta qyrylýy múmkin.

«Zalaldy joıý úshin barlyq kúsh pen qural jumyldyryldy: óńirdegi iri kásiporyndardyń tehnıkalary, TJ qyzmetteri jáne jergilikti atqarýshy organdar tartyldy. Sýdy sorý jáne qalpyna keltirý jumystary kúsheıtilgen rejımde jalǵasýda. Jaǵdaı erekshe baqylaýda. Mal ıelerimen jumys júrgizilip, zamanaýı monıtorıń quraldary men arnaıy tehnıkalar paıdalanylýda», - dep habarlady Mańǵystaý aýdany ákimdigi.