InfoHub Logo

Jetisý oblysynda «Aýylda densaýlyq saqtaýdy jańǵyrtý» ulttyq jobasynyń aıasynda jalpy sany 59 nysan salyndy. Atap aıtqanda,    2023-2025 jyldar aralyǵynda 15 dárigerlik ambýlatorıa, 39 feldsherlik-akýsherlik jáne 5 medısınalyq pýnkttiń qurylysy aıaqtaldy, - dep habarlaıdy Jetisý oblysy ákiminiń baspasóz qyzmeti.

Oblystyq densaýlyq saqtaý basqarmasynyń málimetinshe, medısınalyq kómektiń qadamdyq qoljetimdiligin qamtamasyz etý jáne shalǵaıdaǵy aýyldardy medısınalyq qyzmetpen qamtý maqsatynda qolǵa alynǵan Ulttyq joba aıasynda Kerbulaq aýdanynda - 17, Panfılov - 11, Alakól - 9, Qaratal - 6, Eskeldi - 5, Aqsý men Kóksý aýdandarynda – 4-ten, Sarqan aýdanynda 3 densaýlyq saqtaý nysany boı kóterdi.

Solardyń biri – ótken jyldyń sońynda qurylysy aıaqtalyp, osy jyldyń qańtar aıynda ashylǵan Panfılov aýdany Dıhanqaırat aýylyndaǵy jańa feldsherlik-akýsherlik pýnkt. Atap aıtqanda, bul aýylda 1 200 turǵyny bar. Buǵan deıingi medısınalyq mekeme 1980 jyly salynǵan eski ǵımarat bolǵandyqtan, qyzmet kórsetýde qolaısyz bolatyn. Jańadan paıdalanýǵa berilgen ǵımarat qajetti medısınalyq quraldarmen jabdyqtalyp, zamanaýı ınjenerlik júıelermen tolyq qamtylǵan. Munda qabyldaý bólmesi, aldyn-ala qabyldaý jáne kúndizgi qabyldaý bólmeleri, emdeý bólmeleri, vaksınasıa kabınetijáne basqa da qajetti bólmeler  qarastyrylǵan.

Jańa FAP-ta 3 medısına mamany jumys isteıdi. Solardyń biri otyz jyldan astam tájirıbesi bar feldsher Gýlınur Qambarova jańa ǵımaratty kópten kútkenin jetkizdi.

- Biz burynǵy ǵımaratty kómirmen jylytyp, tar bólmelerde qolaısyz jaǵdaıda turǵyndarǵa medısınalyq kómek kórsetip keldik. Zamanaýı medısınalyq jabdyqtar joq bolǵandyqtan, turǵyndardy kóbine aýdan ortalyǵyna jiberetinbiz. Qazir jańa feldsherlik-akýsherlik pýnktte alǵashqy kómek kórsetýge, emdik sharalar júrgizýge qajetti jabdyqtardyń barlyǵy bar. Mekemeniń elektrmen jylytylatyny, keń, jaryq ári qolaıly bolǵany qýantady, - deıdi ol.

Bul qýanyshty jańalyqqa aýyl turǵyndary da rıza.

- Aýylymyzda jańa feldsherlik-akýsherlik pýnkt ashylyp otyr. Buryn da osyndaı mekeme bolǵan, biraq ol tar, eski ǵımarat edi. Qazirgi FAP keń, qajetti emdik bólmeleri jetkilikti, zamanaýı jabdyqtary bar. Aýyl turǵyndarynyń densaýlyǵyn saqtaýǵa osyndaı qolaıly jaǵdaı jasalǵanyna qýanyshtymyz, - deıdi aýyl turǵyny Baıan Kóbenbaeva.  

Atap ótsek, Ulttyq jobaǵa Panfılov aýdandyq kópsalaly aýrýhana da engizilgen. Qazir atalǵan nysannyń qoldanystaǵy ǵımaratyn qaıta jańartý men jańa korpýsyn salý boıynsha qurylys jumystary júrgizilýde.