InfoHub Logo

Bilim mınıstri Juldyz Súleımenovanyń muǵalimder attestasıasyna qatysty engizbekshi bolǵan jańa erejeleri qoǵamda qyzý talqylanyp jatyr. Osyǵan oraı, belsendi pedagog Aıman Saǵıdýlla mınıstrge ashyq hat joldap, jańa júıeniń kemshin tustaryn synǵa aldy.

Bul týraly Infohub.kz aqparat agenttigi habarlaıdy.

Pedagogtiń ashýly úndeýi

Aıman Saǵıdýlla áleýmettik jelidegi paraqshasynda mınıstrdiń áreketine narazylyq bildirdi. Onyń aıtýynsha, mınıstrlik pedagogtermen birge jumys istegendeı bolyp, negizgi sheshimderdi ózderi qabyldap, muǵalimderdi elemegen.

«Juldyz Dosbergenqyzy Súleımenova hanym! Eger bárin ózderińiz sheship tastaıtyn bolsańyzdar, bizdi nege teginnen tegin jumys tobynda 4 aı ustadyńyzdar? Testi de alyp tastadyńyz. Belsendi muǵalimdermen oıyn oınadyńyzdar ǵoı kádimgideı. Nege biz myna ózgeristerdi bilmeımiz, jumys tobynda otyryp?» – dep jazdy pedagog.

«Shoý sabaq» pen balalardyń ýaqyty

Saǵıdýllanyń sózinshe, muǵalimder atestattaýdan ótý úshin 14-15 ashyq sabaq kórsetýge májbúr. Bul jaǵdaı balalardyń oqýyna kedergi keltiredi.

«Biz ashyq sabaqtyń kókesin ótip bere alamyz. Biraq 14-15 ashyq sabaq ótip, lálálá dep júrgenimizde balalarymyz ne oqıdy? Shoý sabaqty kórsetip, ózimizge abyroı jınap, attestasıadan ótip júrgenimizde balalardyń bar ýaqyty biz úshin jumsalatynyn bilesizder me?» – dep aǵynan jaryldy ol.

«Shyndyqtyń qanyn jalaǵan durys edi»

Pedagog mınıstrliktiń áreketin «ótirik» dep atap, shyndyqty aıtýǵa shaqyrdy. Ol jumys tobynan shyǵyp ketkenine qýanyshty ekenin, áıtpese oqýshylardyń kóz jasyna qalar edim dep oılaıtynyn jetkizdi.

«Bir ótirikten qutyla almaı júrgende ekinshi ótirik. Jumys tobynan shyǵyp ketkenim jaqsy boldy. Áıtpese oqýshylardyń kóz jasyna qalar edim. Aıatjan Ahmetjanulynyń bir áńgimesi bar edi: "Ashyq sabaq – teatrlanǵan qoıylym", – degen. BJB men TJB da ótirik. Bilim sapasy da ótirik. Ashyq sabaq ta ótirik», – dedi Saǵıdýlla.

Testke oralý usynysy

Aıman Saǵıdýlla portfolıo men shoý sabaqtardy alyp tastap, ornyna test júıesin qaldyrýdy usyndy. Onyń pikirinshe, mektep baǵdarlamasynan keletin testti bilimi bar muǵalimniń bári tapsyra alady.

«Portfolıony alyp tastap, testi qaldyrý kerek edi. Mektep baǵdarlamasynan keletin testi bilimi bar muǵalimniń bári tapsyra alady. 50 suraqtan qashatyn muǵalimge 140 suraqty tabatyn oqýshy daıyndaýdy tapsyrý uıattaý endi. Juldyz hanym! Áli de oılanyńyz. Attestasıada testi qaldyryp, basqa búkil qujattardy alyp tastańyz. Portfolıo da shoý sabaq ta kerek emes. Test arqyly JOO-ǵa arnalǵan búkil grant taratylady. Al, biz sol testke oqýshy daıyndaıtyn muǵalimbiz», – dep jazdy ol.