InfoHub Logo

Ekibastuzda 25 jastaǵy Ádilet Kendir erekshe jaǵdaıda joǵalyp ketti. Polısıa, týystary men eriktiler ony ekinshi kún boıy izdep jatyr.

Bul týraly Infohub.kz aqparat agenttigi habarlaıdy.

Aqparatqa súıensek, 23 aqpan kúni keshkisin saǵat 21:00 shamasynda Ádilet Qorolev kóshesi, 82 mekenjaıynan qyzyl Hyundai MUFASA avtokóligimen taksı qyzmetine jumys isteýge shyqqan. Sodan beri onyń qaıda ekeni belgisiz bolyp otyr.

Kóligi tabyldy, biraq izdeý jalǵasýda

Keıinnen onyń kóligi Ekibastuzdaǵy kópqabatty úılerdiń biriniń aýlasynan tabyldy. Sol jerde eriktiler izdeý sharalaryn bastady. Tabylǵan vıdeoda izdeý tobynyń múshesi daýys kúsheıtkish arqyly joǵalǵan azamatqa: "Ádilet, shyq, oıan!" dep úndeý tastaǵany kórinedi. Bul sózder jelide qyzý talqyǵa túsken. Keıbireýler bul sózdi orynsyz dep tapsa, endi bireýler áıeldiń janashyrlyǵy men izdeýge nazar aýdartý áreketin quptady.

Polısıa men eriktiler beınekamera jazbalaryn zerttep, Ádilettiń júrgen baǵyttaryn anyqtaýǵa tyrysýda.

Jumysyna shyqpaǵan

Pavlodar oblystyq polısıa departamentiniń habarlaýynsha, jas jigit "iz-túzsiz joǵalǵan" retinde izdestirilip jatyr. Onyń týystarynyń aıtýynsha, Ádilet temirjolda vagondardy tekserýshi bolyp jumys isteıdi. 24 aqpanǵa qaraǵan túni ol jumysqa kirisýi tıis bolǵan, alaıda jumysqa kelmegen.

"Baýyrym eshqashan jumystan qalmaıtyn, eskertpeı joǵalyp ketpeıtin. Árdaıym baılanysta bolatyn. Onyń kóligi bóten aýlada, kameranyń kózine ilinbeıtin jerde turǵan", - deıdi sińlisi.

Onyń aıtýynsha, sońǵy ret ol aǵasymen 23 aqpan kúni keshki saǵat onda telefon arqyly sóılesken.

Aqparat bergenderge syıaqy usynylady

Týystary Ádilettiń qandaı da bir aqparaty bar jandardan habarlasýyn suraıdy. Onyń boıy 165-170 sm, orta deneli, qara shashty. Qolynda saǵaty men arab jazýy bar mór saqınasy bolǵan. Joǵalǵan kúni sur kúrteshe, jasyl sporttyq kostúm jáne qara krosovka kıgen.