InfoHub Logo

Belgili jýrnalıs Asqat Sadyrbaıdyń ústinen qylmystyq is qozǵaldy. Bul týraly Politico.kz aqparat agenttigi habarlaıdy.

İs jýrnalısiń burynǵy jubaıy Aıǵanym Bolatqyzynyń aryzy negizinde tirkelgen. Astana qalalyq Polısıa departamenti bul derekti rastap, tergeý jumystaryn Esil aýdandyq polısıa basqarmasynyń júrgizip jatqanyn málimdedi.

Resmı málimetterge súıensek, 1992 jyly týǵan Aıǵanym Bolatqyzy 1986 jyly týǵan Asqat Muratovıch Sadyrbaevqa qatysty shara qoldaný týraly ótinishpen polısıaǵa júgingen.

İs Qylmystyq kodekstiń 110-baby boıynsha tergelýde

«Atalǵan derek boıynsha 2025 jyldyń 9 qazanynda Qazaqstan Respýblıkasy Qylmystyq kodeksiniń 110-baby 2-bóligi boıynsha sotqa deıingi tergep-tekserý bastaldy», – delingen polısıanyń resmı jaýabynda.

Aıǵanym Bolatqyzy buǵan deıin burynǵy kúıeýiniń ózine zorlyq-zombylyq kórsetkenin, azaptap, soqqyǵa jyqqanyn aıtyp, quqyq qorǵaý organdarynan jáne qoǵamnan kómek suraǵan bolatyn. Asqat Sadyrbaı bolsa, bul aıyptaýlardy joqqa shyǵaryp, jala ekenin aıtyp kelgen. Buǵan deıin jýrnalıs eks-jubaıyn sotqa berip, jeńiske jetkeni de habarlanǵan edi. Alaıda, Aıǵanym Bolatqyzy keıin alǵan jaraqattaryn kórsetip, qaıta aryz túsirgen.

Qazirgi tańda is boıynsha sot-medısınalyq saraptamalar taǵaıyndalyp, tergeý amaldary jalǵasýda. QR Qylmystyq prosestik kodeksiniń 201-babyna sáıkes, sotqa deıingi tergep-tekserý derekteri jarıa etilmeıdi.