InfoHub Logo

1994 jyly qazan aıynda el tarıhynda eleýli oqıǵa boldy. Sol kezdegi prezıdent Nursultan Nazarbaev usynǵan Ákejan Qajygeldındi premer-mınıstrlikke bekitkenimen, onyń orynbasary bolýǵa usynylǵan Altynbek Sársenbaıulyna qarsylyq shyqty. Bul jaǵdaı tipti Nazarbaevtyń ózine de unamaı qaldy.

Bul týraly Infohub.kz aqparat agenttigi habarlaıdy.

Depýtattyń narazylyǵy

Joǵary Keńes otyrysynda Altynbek Sársenbaıulynyń kandıdatýrasy talqylanǵanda, depýtat Altynshash Jaǵanovanyń sózi jurtty tań qaldyrdy. Ol tikeleı prezıdenttiń sheshimin synap, «Bul joly ol qatelesti» dep málimdedi.

«Men tek bir nárseni aıtqym keledi. Nursultan Ábishuly sizdiń kandıdatýrańyzdy qoldady jáne áli de qoldap keledi. Bul joly ol qatelesti», – dedi Jaǵanova.

Sársenbaıulynyń jaýaby

Altynbek Sársenbaıuly bul synǵa: «Bolashaqta baspasóz týraly zań kerek bolmaýy da múmkin, sóz bostandyǵyna kepil bolatyn Konstıtýsıanyń ózi de jetkilikti bolady», – dep jaýap bergen edi. Bul sózder sol kezdegi qoǵamdaǵy sóz erkindigi týraly pikirlerdi aıqyn kórsetti.

Oqıǵanyń sebebi

Keıinnen, Ábish Kekilbaevtyń daýysqa salýymen 58 depýtat qoldap, 61 depýtat qarsy daýys berip, Sársenbaıulynyń kandıdatýrasy bekitilmedi. Altynshash Jaǵanova bul jaıtqa qatysty bylaı dep túsindirdi:

«Prezıdent qatty renjidi. «Alteke, munyńyz ne, ol jaqsy jigit» dedi. «Jaqsy emes, Nureke! Kóresiz áli» dedim. Mine, aıtqanym keldi. Óıtkeni biz depýtat bolardyń aldynda men bir jyl Almaty qalalyq keńestiń depýtaty boldym. Sosyn bir jyldan Joǵary Keńestiń depýtaty bolǵasyn, men ol jaqtaǵy jumysymnan bas tarttym. Sol ýaqytta qalada bul da (Altynbek Sársenbaıuly – red.) depýtat boldy. Jurtty mensinbeı, aıtqan adamdardy qatty toıtaryp otyrdy. Tártibi sondaı boldy. Prınsıpteri basqasha bolatyn. Maǵan unamaıtyn áıteýir», – dedi Altynshash Jaǵanova.

Sársenbaıulynyń ókinishi

Óz kezeginde Altynbek Sársenbaıuly bul jaıtqa qatysty keıingi kezde bylaı dep pikir bildirgen:

«Meni bekitpegenine áli kúnge rızamyn, raqmet! Meniń ornyma bolǵan vıse-premerdiń kezinde búkil áleýmettik salanyń tas-talqany shyqty. Mektepter qysqardy, aýrýhanalar jabyldy, kitaphanalar ǵaıyp boldy. Ol kezde men jastaý edim. Solaqaı sheshimderdiń bárine tabandap qarsy turar edim dep aıta almaımyn. Eger sol kezde vıse-premer bolsam, tas-talqan bolǵan dúnıeniń obaly áli kúnge deıin moınymda turar edi. Meni sol joly Qudaı qaqty. Áli kúnge sol apaıymyzdy kórsem, raqmet aıtqym kep turady».

Bul oqıǵa Asylhan Mamashulynyń «Qıly kezeń» derekti fılminiń 12-bóliminen alyndy.