InfoHub Logo

Pavlodar oblysyna qarasty Maıqaıyń kentindegi jeke turǵyn úıden eki adamnyń shirigen máıiti tabylyp, jaıt boıynsha qylmystyq is qozǵaldy.

Bul týraly Infohub.kz aqparat agenttigi habarlaıdy.

Aldyn ala derekterge súıensek, úı ishindegi bir múrdege eki jyldan astam ýaqyt bolsa, ekinshisi shamamen bes-alty aı buryn kóz jumǵan.

Tragedıanyń sebebi nede?

Oqıǵa ornynan alynǵan aqparattarǵa qaraǵanda, 36 jastaǵy áıel qaterli isikten qaıtys bolǵan. Alaıda, marqumnyń anasy bul jaıtty tıisti organdarǵa habarlamaı, qyzynyń máıitin úıde saqtap otyrǵan. Keıinnen áıeldiń kúıeýi de qaıtys bolyp, onyń denesi de sol úıde qalyp qoıǵan.

«Qylmystyq is qozǵaldy. Qazirgi ýaqytta bolǵan oqıǵanyń barlyq mán-jaılaryn obektıvti túrde anyqtaýǵa baǵyttalǵan qajetti tergeý áreketteri júrgizilýde», – dedi oblystyq polısıa departamentiniń resmı ókili Janna Bilálova.

Bala men áje birge turǵan

Máıitter jatqan úıde ájesi men 6 jasar nemeresi birge turǵan bolyp shyqty. Úı ıesi eshkimdi úıge kirgizbeı, tipti balany balabaqshaǵa da, mektepke de jibermegen.

«Qazirgi ýaqytta bala Maıqaıyńdaǵy aýrýhanaǵa jatqyzyldy. Dárigerler qyz balanyń densaýlyǵynyń jaqsy ekenin aıtady. Damýynda eshqandaı aýytqýshylyq joq. Ázirshe 3 kún osy aýrýhanada bolady. Keıin balany ornalastyrý boıynsha sheshim qabyldanady», – dedi balalar quqyǵyn qorǵaý jónindegi óńirlik ýákil Sáýle Shákenova.

Balanyń zańdy ókilderi anyqtalmaǵandyqtan, ony Ekibastuzdaǵy «Úmit» ortalyǵyna jiberý máselesi qarastyrylýda. Al máıitterdi úıde saqtaǵan egde jastaǵy áıel tergeý amaldarynan keıin úıine jiberildi. Qazir onyń áreketine quqyqtyq baǵa berilip, qylmys quramynyń bar-joǵy anyqtalýda.