InfoHub Logo

Qyrǵyzstannyń Ulttyq qaýipsizdik komıtetiniń (UQK) burynǵy basshysy Kamshybek Tashıev óziniń qyzmetinen bosatylýyna qatysty áleýmettik jelide taraǵan úndeýinde pikirin bildirdi. Bul týraly 24.kg saıtyna silteme jasap Tengrinews.kz habarlady.

Tashıevtiń aıtýynsha, ol prezıdenttiń ruqsatymen emdelý úshin shetelge shyqqan. Qyzmetinen bosatylý týraly sheshim oǵan kútpegen jaǵdaı bolǵanyn atap ótti. Degenmen, memleket basshysynyń sheshimin oryndaý kerektigin aıtty.

«Men memleketimizge, halqymyzǵa jáne prezıdentimizge adal qyzmet ettim jáne bul úshin maqtanamyn. Tek ókinishtisi, jeke qurammen qoshtasýǵa múmkindik bermegeni. UQK-niń árbir qyzmetkerine alǵys aıtyp, tabys tileımin», - delingen úndeýde.

Sondaı-aq, Tashıev azamattardy zańdy qurmetteýge, eldegi beıbitshilik pen turaqtylyqty saqtaýdyń mańyzdylyǵyn aıtyp, zańsyz áreketterge jol bermeýge shaqyrdy.

Eske sala keteıik, 10 aqpanda Qyrǵyzstan prezıdenti Sadyr Japarovtyń Jarlyǵymen Kamshybek Tashıev Qyrǵyzstan Respýblıkasy Mınıstrler Kabıneti tóraǵasynyń orynbasary – Ulttyq qaýipsizdik memlekettik komıtetiniń tóraǵasy qyzmetinen bosatylǵan bolatyn. Prezıdenttiń baspasóz qyzmetiniń habarlaýynsha, bul qadamnyń basty maqsaty – memlekettiń birligin nyǵaıtý jáne qoǵamda, sonyń ishinde memlekettik qurylymdar arasyndaǵy iritkiniń aldyn alý boldy.