InfoHub Logo

Ia, kofe óte sergitedi jáne dámdi. Biraq keıbir jandar kofeınge táýeldilikten nemese medısınalyq qarsy kórsetilimderden kofeden arylýdyń balama ádisin izdeýge májbúr. Dıetologtar tańǵy as ornyna keńes beretin birneshe sýsyn:

Kók sháı

Kók sháıdiń alergıany jeńildetýge, tis aýrýynyń aldyn alýǵa jáne kórý qabiletin jaqsartýǵa bolatyndyǵy ártúrli zertteýlermen dáleldendi. Sondaı-aq, holesterındi qalypqa keltirýge kómektesedi. Quramynda kofege qaraǵanda kofeın az, sondyqtan uıqynyń buzylýyna zardabyn tıgizbeıdi.

Aıran

Bul asqazany «mazasyz» jandarǵa tamasha sýsyn. Óıtkeni, aıran — probıotıkterdiń kóp mólsheri bar sút ónimi. Iogýrtqa qaraǵanda, onyń quramyndaǵy paıdaly bakterıalar (ıa, bakterıanyń da paıdalysy bolady) áldeqaıda alýan túrli bolatyndyqtan, ıogýrt ornyna aırandy ishken abzalyraq.

Lımon sýy

Ash qarynǵa lımon shyryny qosylǵan bir staqan sý — tún ishinde joǵalǵan organızmdegi suıyqtyqty toltyrady (kóp terlemeseńiz de, ylǵal únemi teriniń betinen býlanyp ketip otyrady). Jarty lımonnyń shyrynyn 200 ml sýǵa qosyp ishesiz nemese ózińizdiń ishetin normańyzǵa baılanysty. Osylaısha sizdiń deneńizge S vıtamıni men polıfenoldar jetkilikti túsedi. Polıfenoldar — paıdasy mol antıoksıdanttar. Eger siz kúndelikti tańerteń osyndaı sýsyn ishetin bolsańyz, ımýnıtetińiz kúsheıip, terińiz jaqsaratynyna kúmánińiz bolmasyn.

Smýzı

Bul óte tanymal sýsyn bolǵanmen, onyń qanshalyqty paıdaly bolatyndyǵy oǵan qosylatyn ıngredıentterge baılanysty. Mysaly, jemisterdi kóp qospaýyńyz kerek — olar qandaǵy qantty arttyrýy múmkin. Shpınat, qyzylsha, oramjapyraqtan nemese basqa ózińizdiń súıikti kókónisterińizden qossańyz bolady. Aqýyz týraly umytpańyz — maısyz sút nemese arnaıy proteın untaǵynan qosyńyz. Al smýzıdi odan da paıdaly etý úshin avokadomen qabyldaýǵa bolady. Bul paıdaly maılardyń tamasha kózi, ol sizge uzaq ýaqyt boıyna qarnyńyzdyń ashpaýyna kómektesedi.

Oqýǵa keńes beremiz:

Keremet áseri bar tabıǵı "energetıkter"

---