InfoHub Logo

Kókshetaýda marafonǵa qatysqan áıel qaıtys boldy

Kókshetaýda jartylaı marafon kezinde ózin jaısyz sezingen áıel kóz jumdy, dep habarlaıdy Infohub.kz.

Aqparat agenttiginiń Aqmola oblystyq dene shynyqtyrý jáne sport basqarmasynyń baspasóz qyzmetiniń habarlaýynsha, 23 tamyz kúni «Kókshetaý shamdary» atty jartylaı marafon ótken.
Marafon kezinde 35 jastaǵy áıeldiń jaǵdaıy kúrt nasharlaǵan. Ol bes shaqyrymdyq qashyqtyqty júgirip kele jatqan. Jedel járdem kelgenshe áıelge alǵashqy kómek kórsetilgen.
Jedel járdem brıgadasy kelgen soń áıeldiń talmasy ustap, júrek soǵysy toqtap qalǵan. Oǵan shuǵyl kómek kórsetilip, kópbeıindi oblystyq aýrýhanaǵa jetkizilgen.
Aýrýhanada da júrek soǵysy qaıta toqtap, naýqas jansaqtaý bólimine jatqyzylǵan. 24 tamyz kúni tańǵy saǵat 05:45-te áıeldiń bıologıalyq ólimi tirkelgen.
Medısına qyzmetkerleriniń aıtýynsha, onyń óliminiń naqty sebebi sot-medısınalyq saraptamadan keıin belgili bolady eken.
«Marafonǵa tirkelý kezinde barlyq qatysýshy ózderiniń jarysqa fızıkalyq turǵydan daıyn ekenin jáne densaýlyǵyna tolyq jaýapty ekenin rastaıtyn qolhatqa qol qoıady. Bul – álemdik tájirıbede osyndaı marafondarda qabyldanǵan talap. Marafon bastalǵan kúni úsh núktede medısınalyq qyzmetkerler alǵashqy kómek kórsetýge daıyn turdy. Júgirý baǵyttary polısıa jáne jedel járdem qyzmetimen aldyn ala muqıat pysyqtaldy», dep tolyqtyrdy basqarma ókilderi.
Aqmola oblystyq polısıa departamentiniń baspasóz qyzmeti áıeldiń ólimine baılanysty qylmystyq is qozǵalǵanyn jáne tergeý júrip jatqanyn habarlady.