InfoHub Logo

Elimizde kolejderge qujat qabyldaý bastaldy. Balalar jylynda 128 myń grant bólinip, rekordtyq kórsetkishke jetti. Bul byltyrmen salystyrǵanda 45 myńǵa artyq.

Bilim berý granttarynyń basym bóligi tehnıkalyq mamandyqtarǵa bólinedi: IT, qurylys, ınjenerıa, metalýrgıa.

Taǵy bir jaǵymdy jańalyq bar. Endi aldaǵy oqý jylynda qazaqstandyq kolejder «Robototehnıka jáne kiriktiriletin júıeler», «Addıtıv óndirisi tehnologıalary», «Ǵımarattardy jobalaý men paıdalanýdyń avtomattandyrylǵan júıeleri», «Grafıka jáne mýltımedıa dızaıny», «Landshaft dızaıny» jáne basqa da jańa mamandyqtar boıynsha kadrlar daıarlaýdy bastaıdy.

Talapkerlerge yńǵaıly bolý úshin qujattardy qabyldaý úrdisi avtomattandyryldy. Qujattar Egov.kz elektrondy úkimet portaly arqyly qabyldanyp jatyr. Sondaı-aq qabyldaý kolejderde dástúrli qaǵaz formatynda da júzege asyrylady.

Budan bylaı talapkerler birden 4 mamandyqty tańdap, elimizdiń 4 kolejine qujat tapsyra alady. 2021 jyly bilim berýdiń ashyqtyǵy men qoljetimdiligin qamtamasyz etý úshin mınıstrlik «aqsha stýdenttiń sońynan júredi» qaǵıdaty boıynsha memlekettik tapsyrystardy bólýdiń jańa mehanızmin engizdi. Buǵan deıin granttardy kolejder arasynda bilim basqarmalary ornalastyryp kelse, endi memlekettik tapsyrys talapkerlerdiń tańdaýy boıynsha bólinedi. Iaǵnı túlek qaıda oqýǵa túskisi kelse, búdjet aqshasy sol jerge jiberiledi.

«Búgingi tańda 9-synyp túlekteriniń 70%-ǵa jýyǵy elimizdiń kolejderinde memleket esebinen tegin oqyp jatyr. Bıyl memlekettik tapsyrysty 45 myń orynǵa kóbeıttik. Sondaı-aq mınıstrlik jumysqa ornalastyrý mindettemesimen kásiporyndardyń suranysy boıynsha kadrlardy maqsatty daıarlaýdy engizdi. Iaǵnı qazirdiń ózinde balalardyń jumysqa ornalasýyna kepildik beriledi. Bul eńbek naryǵynyń suranysyna saı mamandardy shyǵarýǵa jáne olardy daıarlaý sapasyn arttyrýǵa múmkindik beredi. Memlekettik tapsyrysty ornalastyrýdaǵy ashyqtyq barlyǵyna tehnıkalyq jáne kásiptik bilimniń qoljetimdiligin qamtamasyz etedi jáne kolejder arasyndaǵy básekelestikti arttyrady», - dep túsindirdi QR Oqý-aǵartý mınıstrligi Tehnıkalyq jáne kásiptik bilim departamentiniń dırektory Nasymjan Ospanova.

Orta býyn jáne qoldanbaly bakalavr mamandyqtaryna túsetin talapkerler arasynda irikteý bilim basqarmalarynyń aqparat júıesi arqyly júrgiziledi. Konkýrs sertıfıkattyń mindetti jáne beıindik pánderiniń ortasha baly boıynsha ótkiziledi.

Jumysshy mamandyǵyn alǵysy keletin orta mektep túlekteri, sondaı-aq erekshe bilim berý qajettiligi bar balalar kolejge áńgimelesý qorytyndysy boıynsha qabyldanady. Olar Egov.kz arqyly onlaın ótinish bere alady nemese qujattardy tikeleı kolejge tapsyra alady.

Pedagogıkalyq, medısınalyq jáne shyǵarmashylyq mamandyqtarǵa túsetin túlekter arnaıy ne bolmasa shyǵarmashylyq emtıhandar tapsyrady nemese áńgimelesýden ótedi. Olardy kolejderdiń qabyldaý komısıalary júrgizedi.

Memlekettik tapsyrys boıynsha 9-synyp talapkerleri arasyndaǵy konkýrs 19-22 tamyz aralyǵynda ótedi. Al 11-synyp jáne kolej túlekteri arasyndaǵy baıqaý 22-25 tamyz aralyǵynda ótedi. Óner jáne mádenıet mamandyqtaryna túsetinder úshin baıqaý 29 shilde men 2 tamyz aralyǵynda ótedi.

Byltyrdan bastap kvota sanattarynyń tizimi keńeıtilgenin de atap óteıik.

«Kvota 9 sanatqa beriledi. Kóp balaly otbasy balalary úshin 5%, keminde úsh jyl tolyq emes otbasy mártebesi bar otbasy balalary úshin - 1%, bala kezinen múgedek balalardy tárbıelep otyrǵan otbasylardan shyqqan balalar, İ jáne İİ toptaǵy múgedekter úshin - 1% kvota engizildi. Upaılar teń bolǵan jaǵdaıda kvota sanaty men sertıfıkattyń ortasha baly esepke alynady», - dep atap ótti Nasymjan Ospanova.

---