InfoHub Logo

Qazaqstanda rezonansty onlaın-kazıno 1Win isine qatysy bar Lamborghini Huracan sýperkary memlekettik saýdaǵa shyǵaryldy. Qyzyl tústi kóliktiń bastapqy baǵasy naryqtaǵy baǵadan úsh ese joǵary baǵalanyp otyr.

Bul týraly Infohub.kz aqparat agenttigi habarlaıdy.

Kólik saýdasynyń erekshelikteri

Elektrondy saýda saıtynda 2016 jylǵy Lamborghini Huracan kóligi satylymǵa qoıyldy. Bul kólikti Almaty qalasy boıynsha Memlekettik múlik jáne jekeshelendirý departamenti satýda. Saýda 20 aqpanda ótedi.

Kóliktiń bastapqy baǵasy – 343 332 000 teńge. Al onyń naqty baǵalanǵan quny – 114 444 000 teńge. Satýshynyń málimetinshe, kóliktiń jaǵdaıy qanaǵattanarlyq, biraq tehpasporty men memlekettik nómirlik belgisi joq. Sondaı-aq, kólikke shekteýler men tyıym salýlar bar.

1Win isimen baılanysy

Bul kóliktiń 2024 jyly Qarjylyq monıtorıń agenttiginiń (QMA) málimetterinde atalǵan Lamborghini Huracan-ǵa uqsas ekeni aıtylady. Sol kezde 1Win onlaın-kazınosyn uıymdastyrýshylardan osyndaı kólik tárkilengen bolatyn.

1Win onlaın-kazınosyna qatysty tergeý 2023 jyldyń tamyzynda bastalǵan. Tergeý málimetteri boıynsha, bul platforma Qazaqstanda ǵana emes, TMD elderinde de jumys istep, myńdaǵan adamdy, sonyń ishinde kámeletke tolmaǵandardy oıynǵa tartqan.

2026 jyldyń 11 aqpanynda QMA resmı túrde onlaın-kazıno uıymdastyrýshylarynyń múlikteri memleket kirisine tárkilengenin rastady. Olardyń qatarynda Mercedes Maybach S500, Lamborghini Huracan, Toyota Land Cruiser jáne bank shottaryndaǵy aqshalar bolǵan. Sot qaýlysymen jalpy quny 420 mıllıon teńgeden asatyn múlik memleketke tárkilendi.

İs boıynsha tórt kúdikti 2024 jyldan beri halyqaralyq izdeýde.