Baıaǵyda jas bala ediń sen‚
Oıyń buzylmaǵan, kóńil!
Perishteden taza ediń sen‚
Qıanat qylmaǵan kóńil!

Ata-anańa mahabbatyń,
Boıaýsyz nur, kárámatyń.
Joǵary ǵarshydan zatyń,
Anyq shyn bul maǵan‚ kóńil.

Jigittikke jetelegen,
Sekýnd, mınýt, saǵat degen.
Jaralys bul solaı degen,
Balalyqty urlaǵan kóńil!

Bilem, bolam, ozamyn dep,
Bıikke qol sozamyn dep,
Aqyr bir kún tozamyn dep,
Asyǵys zyrlaǵan kóńil!

Ataq, maqtan, qumar, paıda,
Ózimshildik, zulym, haıla
«Jetesiń‚ qý‚ – dedi‚ – áıda!»
Boıalyp, syrlanǵan kóńil!

Bu boldy qaıta bip týys
Tysy tolyq, ishi qýys.
Álemdi qyldy bir ýys,
Tereńge zymyraǵan kóńil!

Balalyq‚ tazalyq óldi.
Júrektiń aq nury sóndi.
Amalsyz osyǵan kóndi.
«Durys» dep tyńdaǵan kóńil!

Túzelmes min emes bular,
Ár ómir óz isin qylar.
Synarlyq taǵy mezgil bar,
Aýyspaı turmaǵan kóńil!

Qyryq jyldan jas ótkende‚
Qyzýdyń kóbi ketkende‚
Esepter kezi jetkende‚
Ne bolar burmaǵan kóńil!

«Kelip qaıdan, baram qaıda?
Ne qylǵanym bolar paıda?
Qalamyn ba mola bop saıda?» –
Degen oı tyrnaǵan kóńil!

Jıyrma jyl júrek tesip,
Biri olaı‚ biri bulaı desip,
Alynǵansha anyq sheship,
Tynym ap tynbaǵan kóńil!

Búgin taýyp tilegendi,
Haqıqatqa kóńil sendi.
Qýanyp, túrlenip endi,
Boztorǵaı shyrlaǵan kóńil!

Búgin meniń ulys kúnim,
Baǵymdy ashqan qadir túnim.
Jetilip tur qyzyl gúlim,
Bulbuldaı jyrlaǵan kóńil!

Kózim kórdi degendeı is
Tabyldy. Ket‚ joǵal, keıis!
Ólimniń shyn túbi – beıis‚
«Anyq» dep ymdaǵan kóńil!

Tazalyqqa taǵy kettim‚
Balalyqty qýyp jettim.
Joǵary ǵarshydan óttim‚
Osyny shyndaǵan kóńil!

Tereń oısyz keı aramter
«Ólimnen soń ómir joq» der.
Ókinip qaıǵymen óter‚
Moıynsunbaǵan kóńil!

Kelem deseń‚ ólim‚ maǵan‚
Dosymsyń‚ jaý emen saǵan.
Esikti ash joldy baılaǵan‚
Jónelsin unaǵan kóńil!

---