InfoHub Logo

Vokzal nachalnıgi, bedireıgen qaranyń bizge bergen jaýaby:

— Oryn da joq, bılet te joq.

Árıne, "joq" degen soń qaıtalap suraýdyń da qajeti joq. Degenmen, poezdyń kelýin kútińkirep tur edik, ker jorǵany, dóńgelente quıyltyp, enteletip keldi de, attan bireý túse qaldy. Turǵandar:

— Maıprom! Maıprom! — desip (maı daıyndaý mekemesiniń qyzmetkeri solaı atanyp ketken) dý ete tústi. Maı jaqqan qalashtaı jyltyraǵan tıpylsha jigit, qol alysyp amandasty da poezdyń jaıyn surady. Kórgen - bilgenimizdi tolyq estip aldy da:

— Tyrp etpeńiz, bıletti men alamyn da shyǵamyn, — dedi.

— Qalaısha, siz, joq bıletti alasyz da shyǵasyz?

— Búlk etpeńiz! — dedi de, júgirdi de ketti. Rasynda "Maıprom" tórt bıletti aldy da keldi. Birli-jarym suraǵanǵa, sybyrlap:

— "Kúlsheli bala súımekke jaqsy" degen maqaldy estigenińiz bar ma? — deıdi. Eger de ol: "bar"... dese, bolǵany:

— Endeshe, búlk etpeńiz, demińiz ishińizde bolsyn! — deıdi de syrt aınalady. Túsingeni túsinip, túsinbegeni ańyraıǵan kúıi qala beredi.

Poezdyń bıletin alyp bolyp, endigi ýaıym vagonǵa qaraı minýde qaldy. "Oryn joq, jaqyndama, óri ket!" — dep, provodnıkterdiń jolatpaıtynyn biletinbiz.

— Bıletti ustap, qalyp qoımasaq... — desem, "Maıprom":

— Búlk etpeńiz! — deıdi, kúlimsirep. Taǵy bir sóz aıtsańyz: "tyrp etpe" dep jaýap beredi. Sóıtip turǵanda poezd keldi. Biraq, vagonnyń mańyna da bara alatyn emespiz, Jaqyndasaq provodnıkter baj ete túsip, omyraýdan qaǵady, Al, "Maıprom" asyǵatyn da, sasatyn da emes, provodnıktiń bireýimen ymdasady, kózin qysady...

Poezd ketý aldynda tur. "Maıprom"nyń qoly shalbarynyń qaltasynda, kózdi ala berip bótelkeniń moınyn provodnıkke qaraı qylt etkizip qoıady.

Poezd júre bergende, bizdiń aıaǵymyz da úzeńgilikke ilindi. Provodnık bizdi aıaǵan, músirkegen adamsyp, kóp qynjylýmen: "qyzmet adamdary bolǵandyqtan ǵana bulardy vagonǵa mingizgendigin" aıtyp jatyr. Bizdiń "Maıprom" da oǵan basyn ıip, qaıta-qaıta shulǵyp, alǵys pen rahmetti aǵytyp jatyr.

— Táńir jarylqasyn, sizdiń kómegińiz arqyly aqshaǵa alǵan bıletimiz chýt-chýt kúıip qaldy, — dese, ol:

— Kórip tursyz ǵoı, vagonda aıaq basar oryn joq, tek siz, bir sóz aıtqan soń, — dep provodnık mińgirleıdi.

— Men, oǵan túsinemin... — dedi de "Maıprom" qaltasynan bótelkeni alyp, provodnıktiń ózinen basqaǵa sezdirmeı, stoldyń astyna ysyryp, jytyryńqyrap jiberdi. Bul "syılyqty kórip kóńildengen provodnık murtynan kúlip, rahattana sóılep, esip otyrdy da, azdan keıin:

— Árıne, sizderdiń sharshaǵandaryńyz qas-qabaqtaryńyzdan bilinip-aq tur. Sondyqtan, men, lajsyzdan aldyn ala zakaz berip saqtalyp kele jatqan oryndy sizderge qaldyrdym, jata turyńyzdar... — degeni - aq sol, "Maıprom" qaıta-qaıta basyn shulǵyp, alǵys aıtty da, bos oryndy kórsetýdi ótindi.

Baryp kórsek bos kele jatqan oryn ekeý emes, tórteý bolyp shyqty. Men oǵan shydamaı:

— Qalaı, bular bar oryndy jasyrady? — desem, "Maıprom":

— Búlk etpeńiz, — dep, jymyń qaǵady. Men oǵan:

— Janym - aý, sen olardy jaman úıretip, álgi bergeniń ne? Bıletimiz bar, onyń ústine... — deı bergenim - aq sol.

— Myńq etpeńiz, — dep, taqymymdy qysyp qoıdy. Bir mánisi bar shyǵar dedim de aqyryn kúttim.

— Demalyńyz, uıyqtańyz, sonan keıin aıtamyn, — dep, teris qarap jatyp qaldy.

Birazdan keıin "Maıprom" óziniń qupıa syryn ashýǵa kiristi. Ol, keıbir provodnıkterdiń "barmaq baspaıyn" kópten biledi eken. "Barmaq baspaı" bolmasa mingizbeıtinin sezip, kúni buryn daıarlanyp, bótelkeni qaltasyna salyp ala kelgen eken. Manaǵy ózi aıtqan: "Kúlsheli bala súımekke jaqsy" degendeı vagonǵa minýi, onan oryn tabylýy, uıyqtaýy, demalýy... mine munyń bári osy bótelkeniń arqasynda bolyp edi, dep shek-silesi qatyp kúldi. Men, oǵan kúlgenim joq, qatty qynjyldym.

---