InfoHub Logo

Qaraly qańtar oqıǵasy barlyǵymyzdy selt etkeni ras. «Kúshimiz birlikte» uranyn ustanyp, bul kúnderdi de artta qaldyrdyq. Osy jaǵdaıdan keıin ata-babalarymyzdyń «Birlik bar jerde-tirlik bar» degen sóziniń mánin tereńirek uǵynǵan sıaqtymyz.

Tarıhtyń qaı kezeńinde bolmasyn birlik degen uǵym árdaıym mańyzdy bolǵanyn kóremiz. Birliksiz eshkimniń de, eshbir eldiń de eshqashan asyǵy alshasynan túspegen. Adamzat ómiri týǵannan bastap kúres, biraq birlesken kúsh-jiger, ózara iltıpat, baýyrmaldyq pen dostyq degen kıeli túsinikter erlikke de, jeńiske de, sán-saltanatqa da, máńgilikke de bastaıdy.

«Birlesken bitiredi, uıymdasqan utady» desek, táýelsiz qazaq eliniń kók baıraǵy jelbirep, álemdik sahnada Azıanyń barysy ispetti nyq qadam basyp kelýi-birlik mánin tereń uǵynýynan.

El birligi degende el qamyn jep, kúńirene oı tolǵaǵan Asan qaıǵy, Jıembet, Qaztýǵan, Buqarlar bastaǵan tereńnen tolǵaǵan jyraýlar eske túsedi. «Birligińnen aırylma, birlikte bar qasıet»-degen Aqtamberdi sózinde úlken mán jatyr.

«Bólingendi bóri alar» degen maqal bar.  Bir kezderi aty shýly, dańqy asqan memleketter nelikten tarıh sahnasynan joǵaldy desek, jaýabyn arazdyq, kúnshildik, bılikke talas degen sózderden tabamyz. Endeshe, beıbit kún astynda bir ananyń balasyndaı Otany, júregi, tilegi bir barlyq qazaqstandyqtardyń túrine, túsine, ultyna qaramaı tatý-tátti ómir súrýi úshin bizge birlik aýadaı qajet. Kúshimiz birlikte ekenin umytpaıyq!

Aıym Tlektes

---