InfoHub Logo

Belarýs prezıdenti Aleksandr Lýkashenko Eýrazıalyq ekonomıkalyq odaqtyń (EAEO) tıimdiligin arttyrý qajettigin aıtyp, áriptesterin bastapqydaǵy ıntegrasıa ıdeıalaryna oralýǵa shaqyrdy. Ol odaqtyń tek «kezekti otyrysqa aınalyp ketpeýi» úshin birlesken óndiristik jobalarǵa basymdyq berý kerektigin atap ótti.

Bul týraly Infohub.kz aqparat agenttigi habarlaıdy.

Birlesken óndirister qaıda?

Aleksandr Lýkashenko EAEO-nyń joǵary ekonomıkalyq keńesinde odaq elderiniń ónerkásiptik kooperasıanyń ornyna birtindep oqshaýlanýyna alańdaýshylyq bildirdi. Onyń aıtýynsha, odaq qurylǵanda birlesken ınvestısıalar tartý týraly aıtylǵan bolatyn, alaıda qazirgi jaǵdaı múldem basqa. «Qazir árkim ózinshe jabylyp aldy, tipti tyshqan da syımaıdy. Birlesken odaq týraly qalaı aıtýǵa bolady?» – dep máseleniń ózektiligin alǵa tartty.

Belarýs basshysy ónerkásiptik saıasattaǵy jaǵdaıdyń «álsiz ekenin» jáne ony túzetý kerektigin aıtty. Ol kooperasıany yntalandyrý tetigi iske qosylǵanymen, onyń aýqymy men áseri áli de az ekenin atap ótti. «Biz laıyqty odaqtyq jobalardy taba almaı otyrmyz. Sonymen qatar, biz qaıtalanatyn óndiristerdi quryp, odan keıin olardy bir-birimizden qorǵaýǵa tyrysamyz», – dep ókinishin bildirdi.

«İs-áreket bolmasa, jaı sózben aınalysamyz»

Lýkashenkonyń pikirinshe, EAEO-ǵa odaqtyń bastapqydaǵy maqsattary men ıdeıalaryn eske alyp, jumys tıimdiligin arttyrý qajet. «Biz jaqyn arada Eýrazıalyq ekonomıkalyq odaq aıasynda belgilegen negizgi ıdeıalardy iske asyrýda sheshýshi qadam jasaýymyz kerek. Senimmen aıtamyn: odaǵymyzdy tıimdi etýimiz qajet. Ol úshin jumysymyzdy qaıta qarap, jumys isteýge kedergi keltiretin nárselerden bas tartýymyz kerek. Eger muny istemesek, biz jaı ǵana «kezekti otyrysqa aınalyp», sózben ǵana aınalysatyn bolamyz», – dedi ol.

Aıta keteıik, Astanada Eýrazıalyq ekonomıkalyq odaqtyń joǵary keńesiniń otyrysy ótip jatyr. Buǵan deıin Qazaqstan prezıdenti Qasym-Jomart Toqaev EAEO-nyń aldaǵy ýaqyttaǵy negizgi mindetterin atap kórsetken bolatyn.