InfoHub Logo

Avtor: Oraz Berdaly Ǵabıtuly,
Omby gýmanıtarlyq akademıasy, jýrnalısıka fakúltetiniń 3-kýrs stýdenti

Mahabbat – bul jaı ǵana sezim emes. Bul – adam bolmysynyń eń názik ári eń qudiretti kórinisi. Alaıda XXI ǵasyrda mahabbatqa sený – bireýge ertegige senýmen teń, al bireýge ómirdegi eń sońǵy úmitpen jaryq izdeýmen uqsas.

Búgingi qoǵamda mahabbat týraly aıtqanda, kóbimizdiń kóz aldymyzǵa kınolardaǵy jasandy romantıka, áleýmettik jelilerdegi ádemi juptar nemese toı ústindegi dástúrli "mahabbatpen úılendik" sózi elesteıdi. Biraq bul – tek syrtqy qabat. İshki ózeginde shynaıy mahabbat – senim, adaldyq, sabyr, qurbandyq jáne tereń túsinistikten turatyn sheksiz álem.

Mahabbat degenimiz tek gúl men kámpıtten turatyn romantıka emes. Ol – naýqasty qaraýsyz tastamaý, ómirdiń qıyn sátinde serigińniń qolyn bosatpaý, onyń álsizdigin qabyldap, kúte bilý. Ókinishke qaraı, kóp adam mundaı mahabbatty basynan ótkerip kórmegen, al senbeıtinderdiń kóbi – sol sezimniń jalǵan kóleńkesinde kúıip qalǵandar.

Menińshe, mahabbatqa sený – aqylmen emes, júrekpen qabyldaıtyn sheshim. Sený úshin dálel emes, shynaıylyq qajet. Sený úshin ertegi emes, sezimdi kótere alatyn rýhanı jaýapkershilik kerek. Eger adam mahabbatqa senýden bas tartsa – ol adam sezimniń emes, qorqynyshtyń tutqynynda qalǵan degen sóz.

Búginde adamdar mahabbatty jıi paıdalanatyn taýarǵa aınaldyryp aldy. Jan-dúnıeniń tylsym úndestigi komersıalyq qatynasqa, al sóz ben áreket arasyndaǵy tepe-teńdik – storısterdegi effektke aınaldy. Degenmen, adam balasy qansha zamanaýı quralmen qarýlansa da, júrekke ámir júrmeıdi. Ol áli de ózin kútetin, ózin túsinetin, ózin aldamaıtyn jandy izdeıdi.

Men mahabbatqa senemin. Biraq bul senim – kórgensiz romantıkaǵa emes, kóz jasy men kúlkisi qatar júretin, bir-biriniń kemshiligin moıyndap, soǵan qaramastan birge qalatyn shynaıy sezimge baǵyttalǵan.

Ómir ózgerýi múmkin. Adamdar da, zaman da. Biraq mahabbat – ózgermeıtin jalǵyz uǵym. Oǵan sený – álsizdik emes, kerisinshe, adam bolyp qalýdyń sońǵy belgisi.

Al siz she?.. Mahabbatqa senesiz be?