InfoHub Logo

Saıasattanýshy Erik İlıasov: "Qoǵamda shynaıylyq joq, al sot prosesi – formalızm men jasandylyqqa toly"

Táýelsiz sarapshy, saıasattanýshy Erik İlıasov eldegi sońǵy rezonansty oqıǵalar men qoǵamdyq máselelerge qatysty synı pikir bildirdi. Onyń aıtýynsha, qazirgi Qazaqstan qoǵamynda shynaıylyqtan alshaq, mazmunsyz ári uranǵa toly úrdis beleń alǵan.

— Eldegi jańalyqtardy bir sózben sıpatta dese, “ótirik” der edim. Sózge is, mazmunǵa qısyn sáıkes kelmeıdi, — dedi ol.

Sarapshy qoǵamnyń qyzý talqysyna túsken Perızat Qaırat isi boıynsha da kózqarasyn ashyq bildirip, bul proseske qatysty birqatar kúmán keltirdi. Onyń aıtýynsha, bul is tek syrtqy áser úshin uıymdastyrylǵan shoýǵa kóbirek uqsaıdy.

— Uıqassyzdyq kóp. Sol baıaǵy iske aspaıtyn arzan dálelder men lúks zattar týraly qaıtalap jaza beripti. Sot prosesiniń deńgeıi de tómendeý. Jasandylyq birden baıqalady. Qyz da, sheshesi de, aınalasyndaǵylardyń bári qazaqy. Tilderin kúrmelep, oryssha áreń sóılep… — dedi İlıasov.

Saıasattanýshy jalǵan dıplom máselesine de nazar aýdardy. Onyń aıtýynsha, eldegi kadrlyq júıeniń álsizdigi men formaldy krıterııler saldarynan, rezúmeler men laýazymdar arasynda úlken alshaqtyq paıda bolǵan.

— Dıplom týraly. Aralaryńyzda ondaılar kóp. Moıyndańyzdar! Nebir túıindemeler aldymnan ótti. Ekiniń biri Garvard, Jeneva t.b. Qashan oqyp úlgergenderin baıqamaısyń, — deıdi sarapshy.

İlıasov buǵan deıin de kúmán týdyrǵan qoǵamdyq qorlarǵa qatysty pikirin qaıtalap, olardyń qyzmetin tıisti baqylaý bolmaǵanyn synady.

— Qoǵamdyq qor jóninde byltyr naýryz aıynda jazyp edim ǵoı. Oıynshyq emes dep. Eger aıyptaýlardyń bári ras bolsa, bul úkimetke, basshylarǵa, jarnamasyn jasaǵan búkil telearnaǵa syn. “Clearance, monitoring” degen nárseler bar. Qoǵamdyq uıym, grant, aqsha degen uǵymdardyń qasynda birge júredi. Mysaly, iri bank aqsha berip, onlaın platforma jasap berip, qaıda qarap otyrǵan? — dedi ol.

Onyń pikirinshe, Perızat Qaırat isi qoǵam úshin úlken sabaq bolýǵa tıis. Adamdar endi tek basshylyqqa ǵana emes, aınalasyndaǵy adamdarǵa da synı kózben qaraı bastaıdy.

— Perızat Qaırat isine raqmet. Biraz adamnyń kózin ashty. Endi árkim bastyǵyna, aınalasyna, al bastyqtar qaramaǵyndaǵylaryna abaılap qarap júredi, — dep qorytyndylady İlıasov.

Saıasattanýshy ótken jyldyń keıbir oqıǵalaryn qaıta qarap shyqqanda, kóptegen nárseniń búgingi kúni áldeqaıda ashyq ári anyq kórine bastaǵanyn da atap ótti.