InfoHub Logo

Qazaqstannyń Qyzyl kitabyna engen azıalyq qabylan Mańǵystaý oblysynda qaıtadan baıqaldy. Bul jabaıy tabıǵattyń baılyǵyn saqtaýdyń mańyzdy belgisi bolyp tabylady.

Bul týraly Infohub.kz aqparat agenttigi habarlaıdy.

Hıshnık 1 sáýir kúni «Qyzylsaı» memlekettik óńirlik tabıǵı parki aýmaǵynda kóringen. Park dırektory Mynbergen Qarataýovtyń aıtýynsha, izshi maman janýardy tabıǵı ortada baqylap, ony beınekameraǵa túsire alǵan.

«Qyzylsaı» parki qabylanǵa meken bolyp keledi

«Bul jyrtqysh sońǵy ret 2025 jyldyń shilde aıynda osy park aýmaǵynda tirkelgen bolatyn. Biraz ýaqyttan keıin jabaıy janýardyń qaıtadan tabylýy, onyń «Qyzylsaı» aýmaǵyn turaqty mekendeı bastaǵanyn kórsetedi. Bul óz kezeginde tabıǵı ekojúıeniń turaqtylyǵy men qorǵalatyn aýmaqtyń bıologıalyq áralýandyǵyn saqtaý deńgeıiniń joǵary ekenin bildiredi», - dedi Qarataýov.

Azıalyq qabylan – iri jyrtqysh mysyq. Onyń denesiniń uzyndyǵy (quıryǵynsyz) 171 sm-ge, quıryǵynyń uzyndyǵy 106 sm-ge, shoqtyǵynyń bıiktigi 80 sm-ge deıin, al salmaǵy 90 kg-ǵa deıin jetedi. Onyń basy úlken, aıaqtary qysqalaý jáne quıryǵy uzyn bolady.

Negizgi qoregi – tuıaqty janýarlar (Ústirt taý qoıy, qaraquıryq).

Buǵan deıin «Qyzylsaı» parkiniń ańshy mamany bul qabylannyń Mańǵystaý oblysyndaǵy jalǵyz ókili ekenin aıtqan bolatyn.

«Bul – erkek qabylan ekeni anyqtaldy. Urǵashylary Túrkimenstan aýmaǵynda mekendeıdi: ol mezgil-mezgil sol jaqqa ketip, Ústirt qoryǵy arqyly qaıtyp oralady. Ázirge Mańǵystaýda fototuzaqtarmen tirkelgen qabylannyń barlyq jaǵdaıy osy bir janýarǵa tıesili», - dep habarlady maman.