InfoHub Logo

Túrkistan qalasyndaǵy IýNESKO-nyń álemdik mura nysany, kıeli Qoja Ahmet Iassaýı kesenesiniń syrtqy qaptamasynyń syrtqa shyǵyp ketkeni týraly fotosýretter áleýmettik jelide tarap, jurtshylyqty alańdatty. Alaıda, bul jaǵdaı josparly túrde júzege asyrylǵan ǵylymı-restavrasıalyq jumystardyń nátıjesi bolyp shyqty.

Bul týraly Infohub.kz aqparat agenttigi habarlaıdy.

Qazaqstan Respýblıkasy Mádenıet jáne aqparat mınıstrliginiń málimetinshe, bul áreket «ǵylymı-restavrasıalyq jumystarǵa daıyndyq maqsatynda glazýrlengen plıtkalardy jergilikti aýqymda jappaı bólshekteý» rásimi bolǵan. Qazirgi ýaqytta kesene kúmbeziniń basqa da qaptama bólikteriniń jaı-kúıi zerttelip, olardy tolyq alyp tastaý jumystary júrgizilýde.

Kúmbezdiń jaǵdaıy men restavrasıa jumystary

Mınıstrlik ókilderiniń aıtýynsha, sońǵy jyldary Qoja Ahmet Iassaýı kesenesiniń kúmbezindegi glazýrlengen jabynnyń keıbir ýchaskelerinde deformasıalyq ózgerister baıqalǵan. Bul ózgerister 2019-2020 jyldary júrgizilgen restavrasıa kezinde salynǵan jabynǵa qatysty bolǵan.

Osyǵan baılanysty, «Qazqalpyna keltirý» RMK mamandary kúmbezdiń tehnıkalyq jaı-kúıin únemi baqylap, ǵylymı-restavrasıalyq jumystarǵa daıyndyq jasap otyrǵan. Mamyr aıynda glazýrlengen qaptamanyń álsiregen ýchaskelerin kezeń-kezeńimen alyp tastaý jumystary bastaldy. Sarapshylar apattyq jaǵdaıdaǵy bólikterdi tolyq bólip alý qajettigin anyqtaǵan. Nátıjesinde, 27 mamyrda «Qazqalpyna keltirý» mamandary glazýrlengen plıtkalardy jappaı bólshekteýdi júzege asyrdy.

Jumystar joǵary deńgeıde baqylaýda

Bul jumystardy Premer-mınıstrdiń orynbasary – Mádenıet jáne aqparat mınıstri Aıda Balaevanyń jeke baqylaýynda ótip jatqany aıtyldy.

«Jaǵdaıdy únemi baqylaý qamtamasyz etilgen. Barlyq sheshimder sarapshylyq qorytyndylar, ǵylymı tásilder jáne mádenı mura nysandaryn saqtaýdyń halyqaralyq standarttary negizinde qabyldanady. Alańdaýǵa negiz joq. Júrgizilip jatqan jumystar – josparly, ǵylymı negizdelgen jáne kesene saqtalmaǵyn, odan ári zaqymdanýyn boldyrmaýdy jáne biregeı eskertkishti bolashaq urpaq úshin uqypty saqtaýdy qamtamasyz etýge baǵyttalǵan», – dep habarlady mınıstrlik.