InfoHub Logo

Qazaqstandyqtardy medısınalyq saqtandyrý júıesindegi jańa "Qalqan" platformasy qyzyqtyrýy múmkin. Áleýmettik medısınalyq saqtandyrý qorynyń (ÁMSQ) basshysy Gúlmıra Sabdenbek bul jańa júıeniń ne úshin qajet ekenin jáne onyń jumysy týraly tolyq aqparat berdi.

Bul týraly Infohub.kz aqparat agenttigi habarlaıdy.

"Qalqan" – jańa júıe emes, damyǵan ınfraqurylym

ÁMSQ basshysynyń aıtýynsha, "Qalqan" burynnan bar júıelerdiń ústine jańadan qosylatyn bólek júıe emes. Bul – Qordyń qazirgi sıfrlyq ınfraqurylymyn damytý jáne ony Qarjy mınıstrligi qoldanyp júrgen zamanaýı tehnologıalyq platformaǵa kóshirý.

"Bul platformany tańdaý sebebi – onda burynnan bar tehnologıalyq sheshimder bar, Qarjy mınıstrligimen ıntegrasıalaý múmkindigi keń jáne jańa ınfraqurylymsyz qajetti fýnksıalardy tezirek iske asyrýǵa múmkindik beredi", – dep jazdy Gúlmıra Sabdenbek óziniń áleýmettik jeli paraqshasynda.

Qosymsha shyǵyn bolmaıdy

Platformany qurý úshin qosymsha qarjy qajet degen aqparat shyndyqqa janaspaıtynyn da basshy rastady. ""Qalqan" platformasyn qurý medısınalyq saqtandyrý júıesi úshin qosymsha shyǵynsyz júzege asyrylady", – dep atap ótti ol.

"Qalqan" – medısınalyq júıe emes

Gúlmıra Sabdenbektiń aıtýynsha, "Qalqan" – bul medısınalyq aqparattyq júıe emes, Damumed jáne basqa da medısınalyq qyzmetterdi almastyrmaıdy. Onyń negizgi maqsaty – qarjy aǵyndarynyń ashyqtyǵyn qamtamasyz etý, kórsetilgen qyzmetterdi tekserý jáne mindetti áleýmettik medısınalyq saqtandyrý qarajatynyń tıimdi jumsalýyn baqylaý.

Bul platforma operasıalardy esepke alýdan shyǵystardy basqarýǵa jáne olardyń tıimdiligin arttyrýǵa baǵyttalǵan sıfrlandyrýdyń kelesi deńgeıine ótýdi bildiredi. Jańa platforma derekterdi biriktirip, esep aıyrysýlardyń ashyqtyǵyn arttyryp, qarajattyń qozǵalysyn tolyq baqylaýǵa múmkindik beredi.

Ár teńgeniń esebi

"Qalqan" platformasynyń basty mindeti – árbir tólengen qyzmettiń rastalǵanyn, al ÁMSQ-nyń árbir teńgesiniń negizdelgenin jáne medısınalyq kómekke baǵyttalǵanyn qamtamasyz etý. Bul júıe medısına salasyndaǵy qarjylyq ashyqtyqty arttyryp, qarajattyń tıimdi paıdalanylýyna jaǵdaı jasaıdy.