InfoHub Logo

QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Ońtústik Qazaqstan oblystyq departamenti aýdandardyń birinde mektep dırektorynyń qyzmetine saı emes ekenin anyqtady.

"Men dál qazir qaı aýdan jáne qaı mektep ekenin aıtpaı-aq qoıaıyn. Búginde tıisti materıaldar etıka jónindegi komısıanyń qaraýyna jiberildi. Sonyń sheshimi shyqqannan keıin biz barlyq aqparatty jarıalaımyz. Degenmen, mektep dırektory qyzmetine saı tıisti biliktilik talaptary bar. Biz quziretti memlekettik organdarǵa xat joldap, ol adamnyń biliktilik talaptaryna saı emes ekenin anyqtadyq", - dedi departament basshysy Álı Kómekbaev búgin Astanada ótken baspasóz máslıxatynda.

Onyń aıtýynsha, qazirgi kezde aýdan deńgeıinde mektep dırektorlary bilim berý basqarmalary arqyly taǵaıyndalady. Al ol jumysqa jergilikti ákimder yqpal etýi ábden múmkin. "Mysaly, jergilikti jerde mektep dırektoryn aýdandyq bilim berý basqarmasy taǵaıyndaıdy. Al onyń ústinde otyrǵan ákim de óz sózin aıtady ǵoı. Resmı túrde ondaı quqyǵy bolmasa da, "myna adamdy jumysqa alshy" deı salady. Amal joq, sol adamdy qoıady. Ákimniń ózi bilim salasynyń sarapshysy bolmasa da, óz yqpalyn jasap otyrady. Sonymen, biliktilik talaptaryna saı kelmeıtin mektep dırektory oryn taýyp otyr. Biz ony anyqtadyq. Aldaǵy eki aptada osy máseleni ádep keńesinde qarastyramyz. Ákimge de, bilim berý basqarmasyna da tıisti sharalardy qoldanamyz. Biraq bunymen shektelýge bolmaıdy", - dep atap kórsetti Kómekbaev.

Departamet basshylyǵy atalǵan mysaldyń negizinde oblys ákimine tıisti usynystardy engizýdi kózdeıdi. Sebebi aımaq boıynsha 1025 mektep bar. "Bizdińshe, jergilikti ákim komısıanyń sheshimine yqpal jasamas úshin mektep dırektoryn taǵaıyndaıtyn komısıa oblysta ótýi kerek. Ol komısıanyń ishinde oblystyq apparat múshesi bolsyn, oblystyq bilim basqarmasynyń ókili bolsyn. Bálkim, qoǵam ókilderi kiredi. Negizgi maqsat - mektep dırektoryn taǵaıyndaýdy ashyq júrgizý. Túbinde qandaı júıe engizilse de, jańaǵydaı jaǵdaılarǵa jol berilmeýi tıis", - deıdi departament basshysy.

---