InfoHub Logo

Májilismender memlekettik satyp alýlardyń jumysyn tekserý kezinde kúrdeli zańbuzýshylyqtardy anyqtady. Ásirese, «Qazatomprom» men «Samuryq-Energo» kompanıalarynyń tenderlerinde san men jetkizýshiler arasyndaǵy sáıkessizdikter baıqaldy. Bul jaǵdaılar tergeýge turarlyqtaı detektıv oqıǵaǵa ulasýy múmkin.

Bul týraly Infohub.kz aqparat agenttigi habarlaıdy.

Depýtat Baqytjan Bazarbek memlekettik satyp alý portalynan alynǵan skrınshottardy kórsetip, birneshe jyl boıy birdeı kompanıalardyń, atap aıtqanda «Tumar» men «Aqnazardyń» iri tenderlerdi utyp kele jatqanyna nazar aýdardy. Mysaly, 2025 jyly olar 20 mıllıard teńgege, al bir jyl buryn 13 mıllıard teńgege kelisimsharttar alǵan. Tipti, bul kompanıalardyń telefon nómirleri de birdeı bolyp shyqty.

«Samuryq-Energo» tenderindegi jasyryn oıyn

«Samuryq-Energo» kompanıasynyń jaǵdaıy tipti qyzyq. Olar qýattylyǵy 4,5 megavatt jel elektr stansıasyn keńeıtý jáne qýattylyǵy 2,5 megavatt eki jel energetıkalyq qondyrǵysyn salý boıynsha tender jarıalady. Jobalyq qujattamany «Global Konsalt» ázirlese, jabdyq jetkizýshi retinde qytaılyq «Gold Chaına Invıjn Enerdjı» kompanıasy kórsetilgen. Nátıjesinde, dál osy kompanıa qurylystyń jeńimpazy atandy.

Alaıda, depýtattyń aıtýynsha, qytaılyq kompanıanyń ózi bul tender týraly múldem habarsyz bolyp shyqty. Kompanıa prezıdentiniń qoly qoıylǵan hatta olar eshqandaı usynys bermegeni, al qujattarda kórsetilgen ókil – Van Gýeı esimdi azamat – ózderinde jumys istemeıtini aıtylǵan.

«Jeńimpaz jarıalandy, al jetkizýshi kompanıa «Samuryq-Energony» múldem bilmeıdi eken! Ol tenderge qatyspaǵan, eshqandaı qujat, komersıalyq usynys bermegen. Demek, bul qujattardy, tenderlik qujattamany jáne komersıalyq usynystardy qoldan jasaý. Bul máselemen Ekonomıkalyq tergeý departamenti aınalysyp jatyr. Qalaısha bulaı bolady?» – dep tańǵaldy Bazarbek. Ol sondaı-aq, tenderdiń jer teliminsiz, ruqsat qujattarynsyz, geodezıalyq zertteýlersiz ótkizilgenin atap ótti.

«Qazatomprom» jaýaby

«Qazatomprom» AQ bas óndiris dırektory Qýanysh Omarbekov bul jaǵdaıǵa qatysty túsinikteme berip, barlyǵy ashyq jáne prosedýralar saqtalǵan dep málimdedi. Onyń aıtýynsha, kompanıalar belgili bir salalarda jumys isteıdi jáne qajetti lısenzıalarǵa ıe. Bir telefon nómiriniń birdeı bolýyna qatysty ol, kompanıalardyń zańgerlerdi jaldaýy múmkin ekenin jáne sol zańgerlerdiń telefondary kórsetilgenin aıtty.

«Biraq «Tumar» men «Aqnazar» – bul bir kompanıa, quryltaıshylary da birdeı!» – dep qarsy ýáj aıtty Bazarbek. – Sizder satyp alýda ártúrli fırmalardyń qatysýyna jaǵdaı jasaýlaryńyz kerek. Sizder tipti qarapaıym jaýap bere almaısyzdar. Sondyqtan bul másele boıynsha tergeý bolatynyna senemin. Tenderler ótkizilip, aqsha bólinip, ıgerilip te qoıdy. Muny sabaq retinde qabyldap, «kelesi joly mundaıdy jol bermeımiz» deseńizder bolady».

«Bulaı aıtý durys emes shyǵar. Bizde jyldyq satyp alýlar on bes mıllıardpen shektelmeıdi. Bizde óte kóp satyp alýlar bar. Sáıkesinshe, ár kompanıanyń qatysýǵa quqyǵy bar. Olar qatyssa, biz olardy keri qaıtarýǵa quqyly emespiz. Keri qaıtarýǵa quqyly bolatyn erekshe negizder tizimi bar. Biraq sizdiń eskertýińiz eskerildi», – dep jaýap berdi «Qazatomprom» ókili.

«Samuryq-Energo» basqarýshy dırektorynyń jaýaby

Óz kezeginde «Samuryq-Energo» AQ qamtamasyz etý jáne táýekelder jónindegi basqarýshy dırektory Asqar Baltabaev, jalǵan jeńimpaz týraly suraqqa jaýap bergende, bir kompanıamen bolǵan sot isin eske aldy. Onyń aıtýynsha, bul eki-úsh jyl buryn bolǵan oqıǵa. Eger bul sol jaǵdaı bolsa, olar sotty jeńgen. Eger basqa jaǵdaı bolsa, qosymsha jazbasha jaýap beretinin aıtty.

Baqytjan Bazarbek komersıalyq usynystardy qoldan jasaý faktisi anyqtalǵan jaǵdaıda «Samuryq-Energo» ne isteıtinin surady. «Mundaı fakti anyqtalsa, materıaldar odan ári tekserý úshin quqyq qorǵaý organdaryna jiberiledi. Fakti rastalsa, kináliler zań boıynsha jaýapqa tartylady», – dedi Asqar Baltabaev.