Men jazbaımyn óleńdi ermek úshin,
Joq-bardy, ertegini termek úshin.
Kókiregi sezimdi, tili oramdy,
Jazdym úlgi jastarǵa bermek úshin.
Bul sózdi tasyr uqpas, talapty uǵar,
Kóńiliniń kózi ashyq, sergek úshin.

Túzý kel, qısyq-qyńyr, qyryn kelmeı,
Syrtyn tanyp is bitpes, syryn kórmeı.
Shý degende qulaǵyń tosańsıdy.
Ósken soń mundaı sózdi buryn kórmeı.
Tań qalamyn aldyńǵy aıtqandy uqpaı,
Jáne aıta ber deıdi jurt tynym bermeı.

Sóz aıttym "Áziret Áli", "aıdaharsyz",
Munda joq "altyn ıek, sary-ala qyz".
Kárilikti jamandap, ólim tilep,
Bolsyn degen jerim joq jigit arsyz.
Ásire qyzyl emes dep jırenbeńiz,
Túbi tereń sóz artyq, bir baıqarsyz.

Batyrdan barymtashy týar dańǵoı,
Qyzshyl da, qyzyqshyl da áýre jan ǵoı.
Arsyz, malsyz, aqylsyz, sharýasyz,
Elirmeli maskúnem baıqalǵan ǵoı.
Bes-alty mısyz báńgi kúlse máz bop,
Qınamaı qyzyl tildi kel, tildi al, qoı!

Óleńi bar ónerli inim, sizge
Jalynamyn, mundaı sóz aıtpa bizge.
Ózge túgil ózińe paıdasy joq,
Esil óner qor bolyp keter túzge.
Sánqoı, dańǵoı, oınasshy, kerim-kerbez,
Qansha qyzyq bolady ózińizge?

---