InfoHub Logo

Atyraý oblysynyń turǵyny Reseıdegi azamattyq áıeliniń mıllıon dollarlyq murasy bar degen syltaýmen birneshe qaraǵandylyqty aldap soqqan. Ol aqshany eselep qaıtaryp beremin dep ýáde etken.

Bul týraly Infohub.kz aqparat agenttigi habarlaıdy.

Sot materıaldaryna sáıkes, alaıaq azamattyq áıeliniń Reseıdegi ata-anasy qaıtys bolǵannan keıin oǵan mıllıon dollarǵa jýyq mura qalǵanyn aıtqan. Alaıda, qujattardy resimdeý, advokattar men notarıýstardyń qyzmetine aqy tóleý úshin 250 myń dollar qajet ekenin alǵa tartqan.

Senimge ıe bolyp, aqsha alǵan

Bul oqıǵaǵa birinshi bolyp 2022 jyly kúdiktimen tanysqan qaraǵandylyq sengen. Ol ózin tabysty kásipker retinde tanystyryp, buǵan deıin onyń salǵan aqshasyn qaıtaryp bergendikten, senim uıalatqan.

Mura týraly áńgime bolǵanda, qaraǵandylyq ózi aqsha salýǵa bel býady. 2023 jyldyń tamyzy men 2024 jyldyń aqpany aralyǵynda ol tanysyna 105 mıllıon teńge bergen. Bul aqsha úshin jer telimderin, aýyl sharýashylyǵy tehnıkasyn, múlikterin jáne páterin satqan.

Dostary da aldanyp qaldy

Keıinnen qaraǵandylyq bul múmkindikti dostaryna da aıtyp, olar da «tıimdi jobaǵa» qatysýǵa sheshim qabyldaǵan. Olardyń biri páterin naryqtyq baǵadan tómen baǵalap satqan. Sot derekteri boıynsha, muny aqshany tez jınaý qajettigimen túsindirgen. Qalǵan somany keıin eselep qaıtaryp berýge ýáde etken. Sodan keıin er adam birneshe nesıe rásimdep, keıin Range Rover kóligin kepilge qoıǵan. Onyń jalpy shyǵyny 38,5 mıllıon teńgege jetken.

Taǵy bir jábirlenýshi birden birneshe bankten nesıe alǵan. Aqshany tanysy arqyly alaıaqqa aýdarǵan. Keıin advokat aqysyn tóleý úshin qosymsha qarajat jiberýdi suraǵan. Nátıjesinde ol 10 mıllıon teńgeden astam qarajattan aıyrylǵan. İs boıynsha jalpy shyǵyn 153 mıllıon teńgeden asqan.

Sot úkimi

Qylmystyq is Qaraǵandynyń Qazybek bı aýdandyq sotynda qaraldy. Sottalýshy jábirlenýshilerden aqsha alǵanyn joqqa shyǵarmady, biraq óziniń kinásin moıyndamady. Ol alaıaqtyq emes, ınvestısıalyq joba týraly bolǵanyn aıtty. Onyń aıtýynsha, qarajat azamattyq áıeli arqyly sheteldik qorǵa baǵyttalǵan, al daý azamattyq-quqyqtyq sıpatta.

Alaıda, sot mura týraly oqıǵanyń oıdan shyǵarylǵanyna kóz jetkizdi. Úkimde jábirlenýshilerge tabystyń tez jáne úlken bolatyny týraly ýádeler berilip, aldaý men senimdi teris paıdalaný arqyly aqsha alǵany aıtylǵan.

Sottalýshy birneshe jábirlenýshige qatysty asa iri kólemde alaıaqtyq jasaǵany úshin kináli dep tanylyp, alty jylǵa bas bostandyǵynan aıyryldy. Sondaı-aq, sot jábirlenýshilerdiń paıdasyna tıisinshe 105 mıllıon, 38,5 mıllıon jáne 9,7 mıllıon teńge óndirip alý týraly qaýly etti.

Úkim zańdy kúshine engen joq.