InfoHub Logo

Mánerlep syrǵanaýdan Olımpıada chempıony atanǵan Mıhaıl Shaıdorovtyń bapkeri aýysady degen qaýesetterge Qazaqstannyń týrızm jáne sport mınıstri Erbol Myrzabosynov jaýap berdi.

Bul týraly Infohub.kz aqparat agenttigi habarlaıdy.

Bapker taǵdyry – sportshynyń óz qolynda

Mınıstrdiń aıtýynsha, bapkerlik shtabqa qatysty sheshimdi sportshynyń komandasy ózderi qabyldaıdy. «Bapker máselesi boıynsha mende aqparat joq. Bizde Olımpıada chempıony bar, ol óz maqsatyna jetti. Al bapkerdi tańdaý – komandanyń óz erkinde», – dedi Myrzabosynov.

Ol Alekseı Ýrmanovtyń sportshy retinde, Olımpıada chempıony retinde jáne joǵary deńgeıdegi shákirt tárbıelegen ustaz retinde erekshe tájirıbesi bar ekenin atap ótti. «Ózi Olımpıada chempıony bolǵan adam, shákirtiniń Olımpıada tuǵyrynan kóringende qandaı sezim bolatynyn biledi», – dep qosty mınıstr.

Shaıdorovtyń jeńisi jáne oǵan degen qurmet

Aıta keteıik, Astanadaǵy saltanatty qarsy alý rásiminde bapker Alekseı Ýrmanov olımpıadalyq chempıon Mıhaıl Shaıdorovpen birge sahnaǵa shyqpaǵan edi. Bul jaǵdaı kópshiliktiń nazaryn aýdardy.

Qazaqstandyq mánerlep syrǵanaýshy Mıhaıl Shaıdorov 2026 jylǵy qysqy Olımpıada oıyndarynda erler arasyndaǵy jarysta altyn júldeger atandy. Ol 21 jasynda Olımpıada chempıony atanyp, el mereıin asyrdy. Qasym-Jomart Toqaev ta Mıhaıl Shaıdorovty quttyqtap, ony «Barys» ordenimen marapattaý týraly sheshim qabyldady.

Olımpıada chempıony 24 aqpannan 25 aqpanǵa qaraǵan túni elordaǵa oraldy. Saltanatty shara aıasynda Shaıdorovqa úsh bólmeli páterdiń sertıfıkaty tabystaldy.