InfoHub Logo

Shymkent qalasynyń jas kásipkerleri, baýyrlas Nurbaqyt pen Aqnıet, otbasylyq kásipti jańǵyrtyp, ulttyq kıimder tigý arqyly tabysty bıznes qurdy. Olardyń «ALAN» brendi búginde júzdegen buıymdy aı saıyn satýmen qatar, Astana men Almaty naryqtaryna da oıysýda.

Bul týraly Infohub.kz aqparat agenttigi habarlaıdy.

Úshinshi urpaq sheberleri

Otbasylyq tigin óneriniń tarıhy tereńnen bastalady. Nurbaqyttyń atasy Keńes Odaǵy kezinde ulttyq bas kıimder tigýmen aınalysqan. Keıin bul kásip anasy Álıaǵa aýysqan. Anasy muǵalim bolyp jumys istegenimen, tigin tigýdi hobbı retinde jalǵastyrǵan. Otbasynyń qosymsha tabys qajettiligi týyndaǵanda, ata-anasy ulttyq kostúmderge tapsyrys qabyldaı bastady.

Dızaınerlik bilimi joq, biraq júregimen tigedi

Nurbaqyt zańger mamandyǵyn, al Aqnıet medısına salasyn oqyǵan. Degenmen, olardyń kásibı bilimi bul saladaǵy jetistikterine kedergi bolmady. Aqnıettiń bala kúngi sýret salý qabileti men Nurbaqyttyń «ornamentter tarıhyna negizdelgen brend qurý» ıdeıasy birigip, «ALAN» brendiniń týyndaýyna sebep boldy.

Alǵashqy ınvestısıa – 300 myń teńge

Bıznesti bastaýǵa Nurbaqyttyń stýdent kezinde alǵan 300 myń teńgelik prezıdenttik shákirtaqysy jumsaldy. Bul aqshaǵa Janome 500E tigin mashınasy satyp alyndy. Alǵashqyda ınternetten alynǵan oıý-órnekterdi tikse, keıin qazaq órnekteriniń tarıhy men maǵynasyn zerttep, óz stılin qalyptastyrýǵa kiristi.

Alǵashqy koleksıa men alǵashqy tabys

Alǵashqy koleksıaǵa bas kıimder, shapandar men pıdjakter kirdi. Barlyǵy úıde tigilip, anasynyń tanystary arqyly satyldy. Alǵashqyda eki pıdjakke 20 myń teńgedeı tabys tapty. 2021 jyly ata-anasymen pikir alshaqtyǵy týyndap, óz betterinshe jumys isteýge sheshim qabyldady.

10 mıllıon teńgege jabdyqtalǵan seh

2022 jylǵa deıin óndiris ata-anasynyń úıindegi shaǵyn bólmede júrgizildi. Keıinnen kásipti keńeıtý úshin seh ashýǵa bel býdy. Jabdyqtardy Qytaıdan tikeleı ákelý arqyly 10 mıllıon teńgeden astam qarjy jumsaldy. Onyń ishinde eki basqarylatyn tigin mashınasy, bes tike tigis mashınasy jáne eki overlok bar. Brend ataýy «Al» (atasy Altarbektiń atynyń alǵashqy árpi) jáne «An» (ákesiniń atynyń alǵashqy árpi) birigýinen quralǵan.

Ulttyq qundylyqtardy jańǵyrtý

Aqnıettiń aıtýynsha, alǵashqyda klasıkalyq tústerge basymdyq bergenimen, keıinnen qazaq halqynyń tarıhyn kıim arqyly baıandaý ıdeıasyn júzege asyrdy. «Ashına» taıpasy men Sultan Beıbarysqa arnalǵan toptamalar shyǵaryldy. Sondaı-aq, «Qazaq» degen jazýy bar órnek arqyly rýlardyń birligin nasıhattady.

TikTok arqyly tanymaldylyqqa jetti

Áleýmettik jeliler, ásirese TikTok, brendtiń keńinen tanylýyna úlken septigin tıgizdi. Bir beınerolık 1,7 mıllıon qaralym jınap, myńdaǵan tapsyrys ákeldi. Instagram jelisinde de belsendilik artqannan keıin, tapsyrystar sany eki ese kóbeıdi. Kásipkerler targetıngtik jarnamaǵa kóp aqsha jumsamaýdy jón kóredi.

Aı saıynǵy tabys pen marja

Buryn aıyna 5-6 buıym satylsa, qazir bul kórsetkish 100-ge jetti. Ortasha aılyq aınalym 500 myń teńgeden 2,5-3 mıllıon teńgege deıin ósti. Bıznestiń marjasy 20-30% quraıdy. Sátti aılarda taza tabys 700-800 myń teńgege jetedi. Rýbashkalar 15 myń, shalbarlar 16 myń, al shapandar 13-30 myń teńge aralyǵynda satylady.

Maýsymdylyq jáne kúndelikti kıim retinde

Naýryz merekesi men jaz aılarynda satylym joǵary bolǵanymen, brend ulttyq kıimdi tek merekege emes, kúndelikti kıýge bolatynyn dáleldep keledi.

Óndiris shyǵyndary men jetkizý

Túrkıa, Dýbaı, Qytaı jáne Taıvan elderinen ákelinetin matalardyń baǵasy metr basyna 3-8 myń teńge aralyǵynda. Bir shapannyń ózindik quny 13-14 myń teńgege jýyqtaıdy, al odan túsetin taza tabys keıde 5 myń teńgeden aspaıdy. Jetkizý qyzmeti úshin klıentterden 2700 teńge alynady, al qalǵan shyǵyndy kompanıa óz moınyna alady.

Shymkenttegi dúken jáne 7 mıllıon teńge shyǵyn

Ótken jyly Shymkentte ashylǵan dúkenderinen 7 mıllıon teńgedeı qarjyny joǵaltty. Jergilikti bazarlardaǵy jalǵa alý júıesi men dızaınerlik jóndeý jumystaryna kóp qarjy ketken. Alaıda, Almaty men Astanadaǵy satylymnyń joǵary ekenin túsinip, dúkendi atele-shoýrýmǵa aınaldyrý arqyly shyǵyndy jabýǵa múmkindik tapty.

Bolashaq josparlar

Búginde kásipkerler tabystyń basym bóligin bıznesti damytýǵa jumsaıdy. Shymkentte eki qabatty keshen salýdy josparlap otyr. Birinshi qabatta flagman dúken, ekinshi qabatta zamanaýı seh ornalasady. Bul jospar óndiristiń ózindik qunyn tómendetip, otbasylyq hobbıdi iri bızneske aınaldyrýǵa múmkindik beredi.