InfoHub Logo

Mınıstr stýdentterdi áskerge alyp ketpeý úshin Qorǵanys mınıstrligine usynys jasady,dep habarlaıdy Infohab.kz.

Qazaqstanda talapkerlerdi áskerı boryshyn óteýge shaqyrý men joǵary oqý oryndaryna qabyldaý merzimderiniń sáıkes kelmeýi birqatar túıtkilderge sebep bolyp otyr. Bul týraly Ǵylym jáne joǵary bilim mınıstri Saıasat Nurbek aıtty.

Mınıstrdiń sózinshe, qazirgi tańda keıbir jastar áli UBT nátıjesin kútpeı jatyp áskerge shaqyrylyp ketýde. Bul olardyń joǵary bilim alýǵa degen múmkindigin shekteıdi.

«JOO-ǵa qabyldaý men áskerge shaqyrý merzimderi úılespeıdi. Jaqynda Nazarbaev ýnıversıtetine tapsyryp jatqan bir talapkerdiń kósheden ustap, áskerge alyp ketken jaǵdaıy boldy. Mundaıǵa jol berýge bolmaıdy», — dedi Saıasat Nurbek Májilis kýlýarynda.

Osy máseleni sheshý maqsatynda mınıstr Qorǵanys mınıstrligine resmı usynys joldaǵanyn málimdedi. Ol talapkerlerdiń UBT nátıjeleri tolyq shyqqanǵa deıin, ıaǵnı shildeniń sońyna deıin áskerge shaqyrýdy ýaqytsha toqtatý bastamasyn usynǵan.

«Bizde UBT 7 shildege deıin ótedi. Nátıjeler shilde sońynda belgili bolady. Sol kezde ǵana talapker naqty “men stýdentpin” dep aıta alady. Osy kezeńge deıin kútý qajet. Qazir bul usynys Qorǵanys mınıstrligimen talqylanyp jatyr», — dep naqtylady vedomstvo basshysy.

Mınıstr bul ózgeris bilim alýǵa umtylǵan jastardyń quqyǵyn qorǵap, ádildik ornatýǵa baǵyttalǵanyn basa aıtty.