InfoHub Logo

2025 jyldyń 5 sáýirinen bastap Qazaqstanda moped júrgizýshilerine qatysty jańa erejeler kúshine endi. Endi moped aıdaý úshin arnaıy júrgizýshi kýáligi qajet bolady jáne kólik mindetti túrde tirkelip, memlekettik nómir alýy tıis.

Bul týraly Infohub.kz aqparat agenttigi habarlaıdy.

Júrgizýshi kýáligin alǵandar qansha?

İshki ister mınıstrliginiń málimetinshe, sońǵy bir jylda 3652 adam A sanatyndaǵy, al 3141 adam A1 sanatyndaǵy júrgizýshi kýáligin alǵan. A1 sanaty 125 tekshe santımetrge deıingi qozǵaltqysh kólemi bar mototehnıkalardy basqarýǵa múmkindik berse, A sanaty qýatty motosıklderdi de júrgizýge ruqsat etedi.

Qyzyǵy, mopedterdi basqarý úshin V sanaty sıaqty basqa kategorıadaǵy júrgizýshi kýálikteri de jaramdy. Bul ereje elektr motosıklderine de qatysty.

Mototehnıkaǵa arnalǵan emtıhannyń qıyndyǵy

«Azamattarǵa arnalǵan úkimet» memlekettik korporasıasynyń derekteri boıynsha, bıylǵy jyldyń basynan beri A sanaty boıynsha teorıalyq emtıhandy 1297 adam tapsyrsa, 1056 adam sátsiz aıaqtaǵan. A1 sanaty boıynsha 603 adam emtıhannan ótse, 592 kandıdat testten óte almaǵan. Bul kórsetkishter mototransportqa arnalǵan teorıalyq emtıhandy alǵashqyda tapsyra almaıtyndardyń úlesi shamamen jartysyna jýyqtaıtynyn kórsetedi.

Memlekettik nómir alǵan mopedter sany

İİM málimetterine súıensek, elimizde bir jyl ishinde 30 248 moped tirkelgen. Ulttyq statısıka búrosynyń dereginshe, Qazaqstanda barlyǵy 46 079 A1 sanatyndaǵy kólik bar.

Mopedti qalaı tirkeýge bolady?

Mopedti tirkeý úshin turǵylyqty jerińiz boıynsha arnaıy HQKO-ǵa júginý qajet. Jeke basty kýálandyratyn qujattardy, kóliktiń tehnıkalyq qujatyn nemese tehnıkalyq sıpattamalary týraly málimetterdi usyný kerek. Sodan keıin ótinish toltyryp, mopedti tekserýden ótkizip, memlekettik bajdardy tóleý qajet. Olar: tirkeý úshin – 0,25 MRP, tirkeý kýáligin berý úshin – 1,25 MRP jáne memlekettik nómir úshin – 1,4 MRP.

Moped júrgizýshileriniń buzýshylyqtary

Erejeler qataıtylǵanyna qaramastan, moped júrgizýshileri arasynda tártip pen mádenıet áli de jetkilikti deńgeıde emes. Mysaly, sáýirdiń 11-12 kúnderi Almaty oblysynda 438 ákimshilik quqyq buzýshylyq anyqtaldy. Olardyń qatarynda qujatsyz kólik basqarý, qorǵanys shleminsiz júrý, qarsy jolaqqa shyǵý, jyldamdyqty asyrý jáne manevr jasaý erejelerin buzý bar.