InfoHub Logo

21 qyrkúıek kúni QR Parlament Májilisiniń otyrysynda depýtat Irına Smırnova bilim berý salasyndaǵy qarjylandyrý máselesin kóterip, qazaqstandyq muǵalimderdiń jalaqysyn myń dollarǵa jetkizý bastamasyn kótergen bolatyn. Osy oraıda BNews.kz tilshisine Qazaqstandyq salalyq bilim jáne ǵylym qyzmetkerleri kásipodaǵynyń tóraıymy Maıra Amantaeva osy máselege qatysty óz pikirin bildirdi.

«Óte oryndy, ýaqytynda kóterilgen bastama. Árıne, depýttatyń bul usynysyn qoldaımyn. Memleket osy salaǵa kóptegen qarjy bólip otyr. Nazarynan tys qaldyrǵan joq. Meniń bilim salasynda eńbek etip júrgenime 40 jyl boldy. Bul salada áli de tıisti sharalar atqarylýy qajet. Olqylyqtar bar. Táýelsiz sarapshylardyń málimetinshe, elimizde 340 myń muǵalim bar. Onyń 61 myńnan astamy 53-60 jas aralyǵynda. Al zeınet jasyna shyqqan ustazdardyń sany 7 myńnan asady. Sondyqtan muǵalim mamandary qartaıyp bara jatyr desem, qatelespeımin. Táýelsiz sarapshylardyń aıtýynsha, elimizde ustazdardyń tek 60%-ynyń jeke basynda úıi bar eken. Al qalǵandary páter jaldap, úı-kúısiz júr. Bul másele, kóbinese, jas muǵalimderge baılanysty. Bul – ustazdardyń áleýmettik jaǵdaıynyń tómen ekendigin kórsetedi. Mysaly, jas muǵalimniń jalaqysy 50 myń teńge. Al onyń bul aqshasy qaıda jetedi? Jaldap turatyn úıi, kıimi, tamaǵy jáne shyǵyndary bar», - deıdi kásipodaq tóraıymy.

Sonymen qatar, Maıra Amantaeva jergilik bılik ókilderi muǵalimderdi qosymsha jumystarǵa tartatyndyǵyn aıtty.

«Halyqtyń ustazǵa degen kózqarasyn ózgertý kerek. Mysaly, jergilikti bılik ókilderi muǵalimderdi stadıondardy toltyrýǵa, bir kereksiz kitaptardy alýǵa, gazet-jýrnaldardy jazdyrýǵa, túrli sharalarǵa qatystyrýǵa qumar. Osydan keıin muǵalimniń bedeli qaıdan bolsyn? Tipti, pedagogıkalyq oqý oryndaryna da jastardyń qulshynysy az. Sebebi, bul mamandyqqa UBT-dan tómen bal alǵandar ǵana barady», - deıdi ol.

Onyń aıtýynsha, elimizde ustazdar men dárigerlerdiń áleýmettik jaǵdaıyn qoldaýdy kúsheıtý qajet.

«Biz damyǵan 30 memlekettiń qataryna kirý úshin aldymen bilim salasyna mán berýimiz kerek. Sebebi, memlekettiń qýattylyǵy onyń bilim deńgeıimen, densaýlyq jáne áleýmettik jaǵdaıymen ólshenedi. Barlyq kásipti oqytatyn muǵalimder. Al búginde olardyń eńbekaqysy óte tómen. Respýblıkadaǵy ortasha jalaqynyń 75%-y. Bilim salasynda jumys istep júrgen jandardyń 86%-y áıel azamattar. Er azamattardyń úlesi az. Nege olar bul salaǵa barmaı jatyr? Óıtkeni, jalaqysy az. Bilimdi muǵalimsiz jańa ınovasıalyq tehnologıalardy meńgermeımiz, ult josparyn da júzege asyra almaımyz. Sebebi, saýatsyz maman salany qurdymǵa jiberedi. Sondyqtan, muǵalimder men dárigerlerdiń jaǵdaıyn jasaýdy – birinshi kezekte turatyn máselelerdiń qataryna qosý qajet», - deıdi M.Amantaeva.

 

---