InfoHub Logo

Aıtysker aqyn Muhamedjan Tazabek Qazaqstannyń tuńǵysh prezıdenti Nursultan Nazarbaevqa qatysty óz oıyn ortaǵa saldy. Ol jýrnalıs Janar Baısemizdiń YouTube arnasyndaǵy suhbatynda bul máselege qatysty pikirin bildirdi.

Aqynnyń aıtýynsha, onyń kózqarasy jeke tulǵalarǵa emes, jalpy bılik júıesindegi qundylyqtarǵa baǵyttalǵan.

"Meniń kózqarasym jeke tulǵalarǵa – Nazarbaevqa, Toqaevqa nemese basqa bılik basyndaǵylarǵa emes, jalpy bıliktiń qundylyqtaryna baılanysty", – dedi Tazabek.

Aqyn "Tuńǵysh prezıdent" uǵymyn otbasyndaǵy tuńǵysh balamen salystyrdy. Onyń pikirinshe, alǵashqy prezıdentke erekshe ókilettikter berilip, barlyq sheshim bir ortalyqqa shoǵyrlanǵan.

Muhamedjan Tazabek ótken kezeńdegi qatelikterdi tek bir adamnyń moınyna artý durys emes ekenin atap ótti. Ol Nazarbaevtyń ózi de kadrlyq jáne basqa da sheshimderde qatelikter bolǵanyn moıyndaǵanyn aıtty.

"Keńestik tapshylyq dáýirinen keıin halyq molshylyqqa umtyldy. Bul tek bir adamnyń áreketine baılanysty emes, búkil qoǵamnyń talpynysy edi. Sol kezde "Men" degen azamattar qaraqshylyqqa bardy, al sheneýnikter memlekettiń múlkin ózderiniki dep sanady", – dep qosty aqyn.

Tazabektiń sózinshe, sol kezde sheneýnikter men yqpaldy azamattar jeke múddelerin alǵa qoıǵan. Ol qatelikterdi tek bir adamǵa júkteýdiń durystyǵyn joqqa shyǵardy.

"Patshanyń janyndaǵylar sol orta men jaǵdaıdy qalyptastyrady. "Tómen oılaıtyndar adamdardy talqylaıdy, ortasha oılaıtyndar oqıǵalardy sóz etedi, al joǵary oılaıtyndar qundylyqtardy saralaıdy". Sondyqtan men barynsha qundylyq turǵysynan oılaýǵa tyrysamyn", – dep túıindedi sózin Muhamedjan Tazabek.

Bul týraly Infohub.kz aqparat agenttigi habarlaıdy.