InfoHub Logo

Búgin Astanada QR Bilim jáne ǵylym mınıstri Erlan Saǵadıev Mońǵolıadan kelgen búrkitshi qyz Aısholpan Nurǵaıypqyzymen kezdesti.

Kezdesý barysynda «Bilim-Innovasıa» halyqaralyq qoǵamdyq qorynyń prezıdenti Darhan Óte mınıstrge Aısholpan týraly aıtyp berdi.

«Aısholpan eń jas búrkitshi retinde «Oskar» syılyǵyna usynylǵan qazaqtyń áıgili búrkitshi qyzy. Ákesimen birge qusbegilikpen jastaıynan aınalysqan. Osy sońǵy maýsymda búrkiti 12 túlki, 2 qasqyr alǵan. Qyzymyz sondaı myqty. Bizdiń qazaqtyń búrkitshilerine sheberlik keńesin bere alatyndaı dárejedegi qusbegi. Aısholpan týraly fılmdi kórip otyryp, onyń «Qazaqstandy kórý armanym» degen sózin estip qaldyq. Mine, sondyqtan, Aısholpandy Qazaqstanǵa alyp kelip otyrmyz. 3-4 kún boıy ol  anasymen birge Astanany aralap júr», - dedi ol.

Darhan Óteniń aıtýynsha, Aısholpandy AQSH-taǵy Oksford jáne Garvard ýnıversıtetteri shaqyrǵan.

«Biz Aısholpandy «Spektrum» mektebinde oqytyp, aǵylshyn tilin meńgerý deńgeıi men akademıalyq bilimin kótereıik dep, ata-anasyna eki jyl osynda oqytýdy usynyp otyrmyz. Ata-anasy sheshim qabyldap, osy jerde oqytýdy oılap jatyrmyz», - dedi Darhan Óte.

Osy tusta mınıstr E.Saǵadıev Aısholpannan Qazaqstanǵa kelgisi kele me, joq pa dep surap kórdi. Qusbegi qyz: «Iá», - dep jaýap berdi.

Erlan Saǵadıev Mońǵolıadan kelgen meımandardan áńgime barysynda, Baıan-Ólgeı aımaǵynda qansha qazaq mektebi baryn surady. Atap ótilgendeı, onda 7-8 qazaq mektebi jumys isteıdi. Bul rette ol Bilim jáne ǵylym mınıstrligi jyl saıyn Mońǵolıaǵa oqýlyqtar jiberip turatynyn aıtyp ótti. Sondaı-aq vedomstvo basshysy Aısholpan «Spektrum» mektebinde qalaı oqıtynyn, osy jaqta ómir súrýi qalaı qamtamasyz etiletinin de bildi.

«Garvardqa oqý degen bir jaǵynan qıyn. Meniń ózim sonda oqyǵanmyn. Biraq, olar Aısholpanǵa birneshe oqý baǵyttaryn beredi. Sol baǵyttardyń arasynda keleshekte mamandyǵyn tańdaýyna bolady», - dedi mınıstr.

Erlan Saǵadıev qajetti kómek kerek bolsa, Aısholpanǵa barynsha kómektesýge ýáde berdi.

«Baspasózdiń betine shyǵyp, arnaıy telearnalarǵa jarıalaý kerek bolyp tur. Ózimizdiń balalarymyzdyń Mońǵolıa týraly bilimin kóterip, sol jaqtaǵy qandastarymyz qalaı turatynyn búgingi jas býynǵa kórsetkimiz keledi. Bizge bul óte mańyzdy. Jyl saıyn Mońǵolıadaǵy qazaq balalaryna oqýlyqtardy jiberip otyrmyz. Biraq, ol jaqtaǵy qazaq balalaryn osynda shaqyryp, kórsetkimiz keledi. Bizde ondaǵy qazaq balalaryna jyl saıyn grant bólinedi. Kópshiligi Almatyǵa nemese Óskemenge keledi. Kópshiligi osynda jumys istep qalyp jatyr. Óte qýanyshtymyz. Ýnıversıtetpen (Aısholpan túskisi keletin - avt.) kerek bolsa ózim sóılesemin», - dep túıdi Erlan Saǵadıev.

---