InfoHub Logo

Otbasy bankiniń «Naýryz» baǵdarlamasy boıynsha ıpoteka rásimdeýge nıettengen qazaqstandyqtardyń úmiti úzildi. Jelide azamattardyń bank talaptaryna saı kelmeı, baspanaly bola almaǵandyqtaryn aıtyp shaǵymdanýy jıilep ketti. Olardyń aıtýynsha, bank qyzmetkerleri men brokerler bergen aqparat shyndyqqa janaspaı, kútken nátıjege qol jetkize almaǵan.

Bul týraly Infohub.kz aqparat agenttigi habarlaıdy.

Kútkendegi men kórgendegi aıyrmashylyq

Jelidegi pikirlerge súıensek, kóptegen azamattar Otbasy bankiniń otbasylyq depozıtterine aqsha salyp, alty aı kútken soń ıpotekaǵa ótinim bermek bolǵan. Alaıda, bank tarapynan «jınaǵan qarjyńyz jetkiliksiz» degen jaýap alǵan. Keıbir otbasylar tipti 2020 jyldan beri aqsha jınap, 7,7 mıllıon teńgeden astam qarajatty arnaıy depozıtte ustap otyrsa da, tek 13 mıllıon teńgelik páterge ǵana ıpoteka usynylǵan.

Baǵdarlama bastalǵanda berilgen ýádeler men ótinim berý kezindegi talaptardyń alshaqtyǵy kópshiliktiń ashýyn týdyrǵan. Keıbir azamattar amalsyz jınaǵan aqshasyn alyp, basqa bankterdiń «7-20-25» baǵdarlamasyna júginýge májbúr bolǵan.

«Naýryz» ıpotekasynyń talaptary qandaı?

«Naýryz» baǵdarlamasy – bul memlekettik ıpotekalyq baǵdarlama. Onyń sharttary boıynsha, áleýmettik jaǵynan osal toptar úshin 7%, al qalǵan azamattar úshin 9% mólsherlememen nesıe beriledi. Baǵdarlamaǵa qatysý úshin sońǵy bes jylda menshik úıi bolmaýy jáne Otbasy bankinde keminde 2 mıllıon teńge jınaq bolýy tıis.

Alaıda, tek jınaq somasy ǵana emes, depozıttegi aqshanyń qansha ýaqyt saqtalǵany da mańyzdy ról atqarady. Bastapqy jarna 10-20% aralyǵynda, al nesıe somasy iri qalalarda 36 mıllıon teńgege, óńirlerde 30 mıllıon teńgege deıin jetedi. Astana, Almaty jáne Shymkent qalalarynda tek jańa salynǵan úılerdi ǵana alýǵa bolady.

Nege barlyǵy óte almady?

Bank ókilderiniń aıtýynsha, «Naýryz» baǵdarlamasy boıynsha irikteý júıesi baldyq júıemen júrgiziledi. Jınaq somasy men depozıttegi syıaqy mólsheri neǵurlym kóp bolsa, ótinimniń qabyldaný múmkindigi soǵurlym joǵary bolady. Osy júıe boıynsha 26 myńnan astam ótinimniń shamamen 16 myńy ǵana maquldanǵan.

Kóbinese úıi joq, turaqty tabysy bar jas otbasylar basymdyqqa ıe bolǵan. Olardyń ortasha jasy – 32, al jınaǵy – 4,3 mıllıon teńge shamasynda. Nekede bolý, balalardyń bolýy, 35 jasqa deıingi jas jáne áleýmettik mártebe sıaqty qosymsha faktorlar da bal jınaýǵa kómektesken.