InfoHub Logo

Bir kedeıdiń úsh balasynyń ortasynda mal degende bir jalǵyz ógizi bolypty. Ógiz orasan úlken eken. Ógizdi ottatý úshin úlkeni — basyna, ortanshysy — beline, kenjesi quıymshaǵyna minip, ottanady eken. Bir kúni jaıylymda júrgende, ógiz ottamaı qalypty. Quıymshaǵynda otyrǵan kenjesi:

— Ógiz japalamaǵaly búgin on kún boldy, osyny orta beldegi ortanshyǵa aıta salyńyz, — dep, janynan ótip bara jatqan bir jolaýshyǵa tapsyrypty. Jolaýshy uzaq kún júrip, keshke qonaǵa ógizdiń belinde otyrǵan ortanshyǵa jetipti. Jolaýshy oǵan kenjesiniń sálemin aıtsa, ortanshysy:

— Osy ógizdiń búıiri ortalanyp, ishi qabysyp bara jatyr ma dep, ózim de kúdiktenip otyr edim, osyny ógizdiń basyndaǵy aǵamyzǵa, bara qalsańyz, joldan aıta ketersiz, — depti.

Jolaýshy túnimen júrip, tań ata ógizdiń basyna jetip, ógizdiń basyndaǵy balaǵa:

— Men osy ógizdi órleı, at shaldyrmastan damylsyz bir kún, bir tún júrip kelemin. Quıymshaqtaǵy kenjeniń ógiz japalamaǵaly on kún boldy dep, ortanshyńyz ógizdiń búıiri ortalanyp, ishi qabysyp bara jatqanyn baıqap otyrmyn dep, saǵan sálem aıtty, — deıdi.

Sonda ógizdiń basyndaǵy bala:

— A, ógiz shóldep júr eken dep, sý izdepti. Mólsherli jerden ógiz qanarlyq mol sý taba almapty. Endi keıin ketip bara jatqan bir jolaýshyǵa ógizdiń basyndaǵy bala tapsyrypty:

— Ógizdi sýarýǵa kól izdep baramyn, ortadaǵy ortanshyǵa ádeıi jolyǵyp aıtyńyz, ógizdi tezdetip tebinsin, — depti. Jolaýshy júrip otyryp, shańqıǵan túste ógizdiń belinde otyrǵan ortanshyǵa kelip, aǵasynyń tapsyrǵanyn aıtypty. Onda ortanshy bala:

— Endeshe erte barsańyz, quıymshaqtaǵy kenjemizge aıta salyńyz, qaýzap, qamshylaı tússin, — depti. Jolaýshy kún uıasyna kire ógizdiń quıymshaǵyndaǵy kenjesine jetip, ortanshynyń tapsyrǵanyn aıtypty. Sonda basynda otyrǵan bala ógizdi aıdyn shalqar kólge ákep sýǵarypty. Ógiz úlken kóldi úsh-aq urttap, qanbaı qalypty. Úsheýi ógizden túsip turǵanda, aspannan bir aqıyq búrkit kelip, ógizdi ilip áketipti. Ógizdi alǵan búrkit aınalyp ushyp júrip, bir báıterekke qonsa, ol báıterek bir serkeniń múıizi eken. Serke múıizin shaıqaǵanda, serkeniń saqalynda kóleńkelep jatqan bir shaldyń kózine ógiz túsip ketipti. Shal kózin ýqalap kempirine:

— Kózime bir shóp túsip ketti, arylta qarap, alyp tastashy, — dese, kempiri ári qarap, beri qarap, taba almaı, ádeıi arylta izdeýge sary atqa mingizip, qolyna sabaý ustatty, salt atty kisi jiberipti. Bul kisi ógizdi úsh kún qarap, ázer taýyp, kózdiń kóline túsip, aram ólgen jerinen toqymǵa salyp, súıretip, shyǵaryp tastapty.

Eki-úsh jyldan keıin ógizdiń óleksesine shóp shyǵyp, súıegi solqyldaǵan saz bolypty. Jaýyryn súıektiń jazyǵyna el jaılap, mal jaıylatyn óris bolypty. Bir kúni otyrǵan aýylymen, jaıylǵan malymen jaýyryndy bir túlki súıreı ala jónelipti. Aýyl adamdary báıge atpen, qyran, tazymen jabyla qýyp júrip, túlkini soǵyp alypty. Túlkiniń terisin ılep, báıbishe balasyna tumaq qylyp berse, bir qulaǵyna jetip, bir qulaǵyna jetpeı qalypty.

— Aıtyńdar, balalar, kim úlken?

---