InfoHub Logo

Germanıa turǵyndary Irandaǵy soǵysqa baılanysty janar-jaǵarmaı baǵasynyń qymbattaýynan jeke kólikterin tastap, velosıped pen qoǵamdyq kólikke otyrýǵa májbúr bolyp otyr. Bul týraly Deutsche Welle saıtyna silteme jasap Tengrinews.kz habarlady.

Saýalnamaǵa qatysqan nemisterdiń 48 paıyzy AQSH pen Izraıldiń Iranǵa qarsy soǵysynyń saldarynan janar-jaǵarmaı baǵasynyń kúrt ósýine baılanysty jeke avtokólikterin paıdalanýdan jıi bas tartqanyn aıtty. Nátıjelerge sáıkes, nemisterdiń 29 paıyzy kólikten velosıpedke aýyssa, 24 paıyzy qoǵamdyq kólikti jıi qoldana bastaǵan.

Germanıa avtoklýbtarynyń málimetinshe, Irandaǵy soǵys álemdik munaı arterıalarynyń biri bolyp tabylatyn Ormýz buǵazyndaǵy keme qatynasyn toqtatqan naýryz aıynyń basynan beri benzın men dızel otyny baǵasy eń tómen deńgeıge túsken. Mysaly, 7 mamyrda Germanıadaǵy E10 benzıniniń ortasha baǵasy lıtrine 1,984 eýro, al dızeldiki – 2,025 eýro boldy. Bul álemdik naryqtaǵy munaı baǵasynyń tómendeýine jáne mamyr aıynyń basynda Germanıa úkimeti engizgen "janar-jaǵarmaı jeńildigine" baılanysty múmkin boldy.

Sonymen qatar, saýalnamaǵa qatysqan respondentterdiń úshten ekisi (67 paıyzy) baǵanyń ósýine baılanysty energıany únemdeýge kóbirek kóńil bólgenin málimdedi. 56 paıyz nemis turǵyndary paıdalanylmaǵan elektr qurylǵylaryn "kútý" rejımine qoıýdyń ornyna óshirip tastaıtynyn aıtty.

Respondentterdiń 55 paıyzy úılerindegi jylytý qurylǵylarynyń qýatyn azaıtqanyn, 52 paıyzy elektr energıasyn tutynýdy sanaly túrde qysqartyp jatqanyn aıtty. 47 paıyzy ystyq sýdy da únemdeıtinin kórsetti.