InfoHub Logo

Qazaqstannyń halyq ártisi, qazaq án óneriniń dara tulǵasy Nurǵalı Núsipjanov áleýmettik jelidegi paraqshasynda jan tebirenterlik jazba jarıalady. Ańyz ánshi bul joly jary, tanymal jýrnalıs Jadyra Seıdeshkege degen shynaıy sezimi men tereń qurmetin bildirdi.

Bul týraly Infohub.kz aqparat agenttigi habarlaıdy.

Ómirdiń talaıyna kýá bolǵan jan serigi

Nurǵalı Núsipjanov óziniń ómirlik jolyndaǵy qıyndyqtar men qýanyshtardy bastan keshkenin aıtyp, jarynyń oǵan qanshalyqty súıenish bolǵanyn jetkizdi. Ánshiniń sózinshe, jas ulǵaıǵan shaqta taıǵaq ǵumyrdyń taram jolynda súıenish bolar serik bolmasa, aldaǵy ómiriniń qalaı óris alar edi dep oılaýǵa da qorqady eken.

«Ata-anańnyń árýaqtarynyń aldynda aq basymdy ıdim, altynym! Jas ulǵaıǵan shaqta taıǵaq ǵumyrdyń taram jolynda súıenish bolar serik kezdespese, ónermen órilip kele jatqan aldaǵy ómirim qalaı óris alar edi? Ol jaıly oılaýǵa da qorqam… Jasyryp, jaba toqyp qaıteıin, taǵdyr talaıyma syzylǵan mańdaıdaǵy jazýdyń ystyq-sýyǵyn bir adamdaı kórdim. Kúıgenim de, kúıingenim de ras, tońyp-jaýraǵanym da ózgeden góri ózime málim… Soqtyqpaly, soqpaqty ǵumyr darıasynyń beder-belesi de az bolǵan joq… Buralań-bultaǵy kóp jalǵan dúnıeniń qıyny men qyzyǵyn da qatar kórdim… Aýrýdyń azabyn arqalatqan jyldary jalǵyzdyqpen betpe-bet júzdestim… Synaldym, biraq synbadym, qulasam da muqalmadym», – dep jazdy ańyz ánshi.

Zıaly qaýymnyń baǵasy

Nurǵalı Núsipjanov Jadyra Seıdeshkege kásibı jýrnalıs retinde de joǵary baǵa beretinin atap ótti. Onyń aıtýynsha, zıaly qaýym ókilderi Jadyrany «dara daryn ıesi, týa bitti talant» dep tanyǵan.

«Basyma syndarly sát týǵanda Alla Taǵala maǵan sóz ónerin serik etken aıaýly arýdy syılady… Qaı ónerdiń de tiregi – asqaq adamgershilik qoı… Kásibı jýrnalıs retinde Jadyrany baǵalaǵan jalǵyz qazaq men emespin. Mańdaıaldy marqasqalarymyzdyń aq batasyn arqalap, aǵa-apalarynyń alǵysyna jastaıynan bólengen Jadyraǵa «dara daryn ıesi, týa bitti talant» dep baǵa bergen de sol zıaly qaýym ókilderi… Talǵat Bıgeldınov, Sher aǵań, Qadyr, Tumanbaı, Farızadaı azýly aqyndar men Ábish Kekilbaı, Gerold Belger, Asanáli Áshimov syndy ańyz adamdardyń bir japyraq Jadyrany tóbelerine kótergenin kózimmen kórdim jáne myń san márte ishimnen: «Shúkir, táýbá!» – dedim», – dep tolǵanysyn bildirdi ánshi.

Júrekjardy tilek

Ánshi óziniń súıikti jaryna týǵan kúnimen jáne Arýlar merekesimen quttyqtaýǵa quqyly ekenin aıtyp, oǵan degen súıispenshiligin jetkizdi.

«Asyldyń synyǵy, tektiniń tuıaǵysyń ǵoı, altynym. Anań ajal saparyna attanǵaly janaryńa muń uıalap, janyńdy qaıǵynyń qasiret taby jaralady. Tunjyraǵan júziń, kúlýden qalǵan kóziń – júregimdi qanjardaı tilip barady… Seniń men úshin jasap júrgen kól-kósir eńbegińdi qazaq rýhanıatyna kórsetken qurmet-qoshemetiń dep bilem. Alladan surarym – aldymda aman júrshi, jaryǵym… Seniń tabanyńa kirgen tiken meniń mańdaıyma kirsin, jaraly janyma jalaý bolǵan bir japyraǵym…», – dep jazbasyn aıaqtady Nurǵalı Núsipjanov.