InfoHub Logo

Keshe, 23 qańtarda Atyraý oblysynyń ákimi Nurlan Noǵaev Maqat aýdanyna jumys saparymen baryp, aýdannyń áleýmettik-ekonomıkalyq jaǵdaıymen tanysty.

Jıynǵa oblystyń áleýmettik salasyna jaýapty qyzmetkerler qatysty.

Keńeste aımaqtaǵy bilim berý, densaýlyq saqtaý, jumyspen qamtý, dene shynyqtyrý jáne sport salalarynyń jaǵdaıy talqylandy.

Oblystaǵy bilim salasynyń hali týraly esep bergen bilim berý basqarmasynyń basshysy Nursáýle Saılaýova balabaqshalarda orynnyń jetpeı otyrǵanyn aıtty. Ol 3-6 jas aralyǵynda kezekte turǵan órenderdiń 85 paıyzynyń ǵana mektepke deıingi mekemelerge baryp júrgenin jetkizdi. 3716 balanyń buǵan múmkindigi bolmaı úıde tárbıe alyp jatyr.

Sonyń ishinde Maqat aýdanynda balabaqsha kezegindegi oqýshylardyń 10 paıyzyna oryn joq ekeni belgili boldy.

Aımaq basshysy Nurlan Noǵaev balabaqsha salý jumystaryn jedeldetý kerektigin aıta kele, kezek problemasyn sheshýge jeke kásipkerlerdi de tartý máselesin qozǵady.

“Memleket balabaqshalar men mektepterdi kóptep salyp jatyr, salady da. Biraq, kezek máselesin tezirek sheshý úshin bul iske jeke kásipkerlerdi tartý jumysyn kúsheıtý kerek. Turǵyndardyń ózderi bas kóterip balabaqshalar ashsyn. Bul bıznespen aınalysamyn degenderge memleket qoldaý kórsetip otyr”, – dedi Nurlan Noǵaev.

Aımaq basshysy, halyq qamyn tek basshylar emes, turǵyndardyń ózderi de kúıttep, jumys isteý kerektigin aıtty.

Qazir balabaqsha ashqysy keletinder úshin engizilgeli jatqan qoldaýdyń bir túri retinde kezekten alyp tastaý máselesin aıtýǵa bolady. Buryn balasyn jeke balabaqshaǵa ornalastyrǵan ata-ana kezegi kelgende memlekettik mekemege aýysyp ketetin. Ol osylaısha eki jaqqa da salmaq salyp, basqa balalardyń ornalasýyna kedergi keltiretin. Endigi ortaq standartta jeke balabaqshaǵa ornalasqan bala kezekten shyǵarylady degen pýnkt bar. Bul jeke kásipkerlerdiń klıentteriniń turaqty bolýyna kómektesedi.

Aıta ketelik, qazir oblysta jeke menshik 30 balabaqsha bar. Onyń 28-i Atyraý qalasynda, bireýi Maqat, ekinshisi Jylyoı aýdanynda jumys istep tur. Mahambet aýdanynda bul iske bir kásipker qyzyǵyp otyr. Qalǵan aýdandarda jeke balabaqsha joq.

Al oblysta barlyǵy 303  mektepke deıingi  uıym bar.  Onyń 164-i balabaqsha, 139-y shaǵyn ortalyq. 

---