InfoHub Logo

Aqordada óner adamdaryna memlekettik marapattar tabystalǵannan keıin, áleýmettik jelide jarty ǵasyrlyq eńbegi bar «Shanshar» teatrynyń akteri Júsip Aqshoranyń elenbeı qalǵany kópshiliktiń nazaryn aýdardy.

Bul týraly Infohub.kz aqparat agenttigi habarlaıdy.

Mádenıet salasyndaǵy marapattar

21 mamyrda Memleket basshysy Qasym-Jomart Toqaev Mádenıet jáne óner qyzmetkerleri kúnine oraı bir top azamatty joǵary nagradalarmen marapattady. Mádenıet salasyndaǵy erekshe jetistikteri men sińirgen eńbegi úshin qurmetke bólengender qatarynda Maqpal Júnisova, Dastan Orazbekov pen Azat Seıitmetov sıaqty tanymal tulǵalar boldy.

Jelidegi pikirler

Osy jańalyq taraǵan tusta Threads jelisinde satırık Júsip Aqshoranyń marapat alýǵa ábden laıyq ekeni aıtylǵan jazba paıda boldy. Jeli qoldanýshysy ónerge endi qadam basqan jastardyń nazarǵa ilinip, kópshilik kóńilinen oryn alǵan aǵa býynnyń shettetilgenine qynjylys bildirdi.

«Mádenıet jáne óner qyzmetkerleri kúnine oraı Prezıdent qolynan marapat alýǵa laıyq kisiniń biri Júsip Aqshora edi. Óner salasyna keshe kelgen «búldirshinderdi» kórip, qalaı jarty ǵasyrdan jurt kóńilinen oryn alǵan aǵalar shet qalyp ketti dep oılap qoıamyn. Dál Aqordanyń ishinde marapat alýǵa laıyq tiri ańyz aǵamyz», – dep jazdy avtor.

Bul pikir qysqa ýaqyt ishinde kóptegen qaralym jınap, oqyrmandar tarapynan qyzý qoldaýǵa ıe bolýda.

Júsip Aqshoranyń shyǵarmashylyǵy

Júsip Aqshora 1960 jyly Túrkistan oblysynyń Qyzyltań aýylynda dúnıege kelgen. Ol halyqqa «Shanshar» ázil-syqaq teatrynyń negizin qalaýshylardyń biri retinde jaqsy tanys. Qazaqstannyń eńbek sińirgen qaıratkeri óziniń óner jolyn Jetisaı qazaq sazdy drama teatrynan bastaǵan. Keıin Sháýildir aýylyndaǵy balalar men jasóspirimder klýbynda túrli qyzmetter atqardy. Al 1994 jyly Ýálıbek Ábdiraıymovpen birlesip ashqan teatrda búginge deıin basty akter retinde sahnada túrli satıralyq obrazdardy sheberlikpen somdap keledi.