InfoHub Logo

Oral qalasynda Ýálı Elamanov atyndaǵy jas desantshylar áskerı-patrıottyq klýby ashyldy. Bul bastamany aýǵan soǵysynyń ardagerleri qoldap, jergilikti bılik pen áskerı-tehnıkalyq mekteptiń qoldaýymen júzege asty.

Bul týraly Infohub.kz aqparat agenttigi habarlaıdy.

Jas sarbazdar Otanǵa ant berdi

Klýbta qazirgi tańda 14-16 jas aralyǵyndaǵy 28 jasóspirim tárbıelenýde. Olar áskerı pánderdi, qoldanbaly jaýyngerlik daıyndyqty, jekpe-jek óneriniń negizderin jáne parashút sportynyń qyr-syryn meńgerýde. Tárbıeshiler oqý prosesiniń qyzyqty ári tartymdy bolýyna erekshe mán beredi.

Tegin bilim jáne patrıottyq tárbıe

Marlen Imanǵalıev, aýǵan soǵysy ardagerleri odaǵynyń tóraǵasy: «Balalar tegin bilim alady. Olar aptanyń seısenbi, sársenbi, beısenbi kúnderi eki saǵattan, ıaǵnı saǵat 16:00-den 18:00-ge deıin daıyndalady. Biz eshkimge kedergi keltirmeımiz. Olar óz sabaqtaryn oqyp, qosymsha konkýrstarǵa qatysa alady. Bos ýaqyttarynda bizdiń sharalarǵa da atsalysady».

Klýbtyń baǵdarlamasyna patrıottyq tárbıe jumystary da kiredi. Jasóspirimder tarıhty zerdelep, belgili ofıserlerdiń ómirbaıanymen tanysady. Klýbqa Batys Qazaqstan oblysynyń týmasy, Qazaqstan Qarýly Kúshteriniń qalyptasýyna eleýli úles qosqan desantshy, general-maıor Ýálı Elamanovtyń esimi berildi. Bul – belgili jerlesimizge degen qurmet pen ólke tarıhyna degen taǵzym.

Urpaqtar sabaqtastyǵy – bolashaqtyń kepili

Ýálı Elamanovtyń uly Qaırat Elamanov: «Bul klýbtyń jas urpaqty daıyndap jatqanyna, desantshy rýhyn, patrıotızmdi, Otanǵa degen súıispenshilikti sińirip jatqanyna óte rızamyz. Bul – ákem ustanǵan ómirlik qaǵıdattar bolatyn. Sondyqtan búgingi kún biz úshin úlken mereke»,- dep qýanyshyn jetkizdi.

Jasóspirimdermen jumys isteý arqyly armıaǵa degen senim qalyptasady. Uıymdastyrýshylardyń pikirinshe, urpaqtar sabaqtastyǵy arqyly elimizdiń batyrlyqqa toly ótkenine laıyqty bolashaǵymyz qalyptasady.